भांगरभूंय | प्रतिनिधी
केरी-सत्तरी: सर्गेस्त रामकृष्णबुवा वझे यादस्तीक संगीत संस्था वझरे दोडामार्ग हांचे वतीन रामकृष्णबुवा वझरे स्मारक भवन वझरे हांगा बुवांचे यादी खातीर संगिताची ‘स्वर स्मृती’ कार्यावळ जाली.
कार्यावळीचें उक्तावण दोडामार्ग हायस्कुलाचे आदले मुख्याध्यापक तशेंच रा. स्व. संघ सिधुदुर्ग कार्यकर्ते सतीश घोडगे हांचे हस्तुकीं जालें. ह्या वेळार माचयेर संस्थेचे अध्यक्ष गंगाराम वझे, सचीव महादेव वझे, भांडारी श्रीपाद वझे हाजीर आशिल्ले.
दिवली पेटोवन आनी बुवांच्या पुतळ्याक फुलांहार घालून कार्यावळीची सुरवात केली. उपरांत जाल्ले कार्यावळींत प्रसन्न प्रभू तेंडुलकार हांच्या गायनान कार्यावळीची रंगत वाडत गेली.
ह्या वेळार हार्मोनियमाचेर अजीत वेळुस्कार तशेंच तबल्याचेर वैभव वझे हांणी सांगात दिलो.
कार्यावळीचें निवेदन श्रीमती विभा वझे हांणी केलें. दोडामार्ग वाठारांतल्यान खूबशा रसिकांनी हे कार्यावळीक हाजेरी लायली. सुरवातेक संस्थेचे अध्यक्ष गंगाराम वझे हांणी सगल्यांक येवकार दिलो. जाल्यार संस्थेचे सचीव मनोज वझे हांणी सगल्यांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
