भांगरभूंय | प्रतिनिधी
भारतांतल्या खेळांमोगींक धपको दिवपी खबर बुधवारा सकाळीं पॅरिसांतल्यान आयली. ती म्हणल्यार बायलां कुस्तीच्या 50 किल वजन गटाचे निमणे फेरयेंत पाविल्ल्या विनेश फोगाटाक वजन वाडिल्ल्यान खेळपाक अपात्र थारायल्या. फक्त 100 ग्राम वजन चड जाल्ल्यान तिका भायर उडयली. आतां तिच्या जाग्यार सेमी फायलनींत हारिल्ली क्यूबाची पैलवान खेळटली. भारतीय आॅलिम्पीक असोसिएशनान निशेध नोंद केला. खेळां मंत्री मनसुख मांडवीय हांणीय फोगाटाक तेंको उक्तायला. भारतीय कुस्ती म्हासंघान आॅलिम्पीक सर्तींतलो हो निर्णय फाटीं घेवपाचें आवाहन युनायटेड वर्ल्ड रेसलिंग संघटनेक केला. नेमकें कितें जाता, तें पळोवपाचें. पूण जाणकारांच्या मतान निर्णय फोगाटाच्या विरोधांतूच वचपाची चड शक्यताय आसा.
फाटोफाट दोन मॅची जातकच विनेशाचें वजन वाडिल्ल्याचें दिसलें. उपरांत रातभर ताणें दोरये वयल्यो उडक्यो, धांवप अशे जायते उपाय घेवन वजन देंवयलें. तरीय 100 ग्रामा खातीर ताका पदकाचेर उदक सोडचें पडलें. फायनलींत पावपी तें पयलें भारतीय बायल पैलवान. आॅलिम्पीक सर्त, संवसारीक सर्त फाटोफाट जिखपी दोन पैलवानांक हारोवन ताणें फायलनींत पावल दवरिल्लें. मात, वजन आडवें आयलें. हातूंत विनेशाचो दोश ना. कारण खेळगड्याचेर कोच, डायटिशन हांचें बारीक लक्ष आसता. तांची घाळपणां ह्या प्रकारा फाटल्यान आसात, अशें भारतीय कुस्ती म्हासंघाक दिसता. वजन गटांत खेळपी सगल्या खेळगड्यांनी खावपा, पिवपाचेर नियंत्रण दवरपाचें आसता. ताका लागून तांचेर रातदीस बारीक लक्ष दवरतात. विनेशाचे बाबतींत नेमकें कितें जालें, तें कांय दिसांनी उक्ताडार येतलेंच.
सोशल मिडीयाचेर प्रतिक्रियांचेर प्रतिक्रिया येत आसात. पूण, तातूंतल्यो चडश्यो व्हाॅट्सअॅप विद्यापीठांतल्या विचारवंतांच्यो. खबरां चॅनलांनी कांय आदल्या खेळगड्यांक विनेशा विशीं विचारलां. हिंद केसरी दीनानाथ सिंह हांच्या मतान, “विनेश हें लढावू वृत्तीचें चली. देशाक ताचो अभिमान आसा. खेळगड्यांक वजन उणें करून सकयल्या वजन गटांत खेळपाची संवय आसता. पूण वजन वाडचें ना, हे खातीर जिबेर नियंत्रण जाय. पोटांत कितें तरी गेले बगर वजन वाडचेंच ना. पैलवानांक उपासाची संवय नासता. एशियाडांत श्यामराव साबळे हाणें आवयन मोगान केल्ले दोन लाडू खाल्ले. मागीर वजन 100 ग्राम वाडून तो अपात्र थारलो.” आॅलिम्पीक खेळिल्लो बाॅक्सर विजेंदर सिंग हाच्या मतान, “100 ग्राम वजन वाडलें म्हूण कोणाक अपात्र थारायनात. पयलीं ट्रायल वेट जाता. मागीर निमणें वजन करपाक आपयतात. थोडें वाडलेंच जाल्यार ताका अर्द वर दितात. मागीर परत वजन करतात. हीं कितें व्हडली गजाल न्हय. विदेशांतल्या अणभवी बाॅक्सरांनी म्हाका हें सांगलां. विनेशा आड कोणे तरी कट केला. भारतीय अधिकाऱ्यांचें थंय कोण आयकना जाल्यार तांणी सर्त सोडून परत देशांत येवपाक जाय. फक्त गजाली मारून कांय साध्य जावचें ना. कितें तरी कठोर निर्णय घेवपाक जाय.”
मार्चांत पटियालांत जाल्ले पात्रताय फेरयेंत विनेश 50 आनी 53 कील वजन गटांत खेळिल्लें. तशें हरशी कोणाचे बाबतींत करीनात. पूण ताका ती संद दिली. हो निर्णय खाशेले समितीन घेतला, आमी न्हय, अशें भारतीय कुस्ती म्हासंघान युनायटेड वर्ल्ड रेसलिंग संघटनेक कळयिल्लें. पंगडाचेर बंदी येवपाची भिरांत आशिल्ली. पूण, मागीर सगल्या पैलवानांक आॅलिम्पीकाक वचपाक परवानगी मेळ्ळी. “हें म्हजें निमणें आॅलिम्पीक. म्हजी कारकिर्द सोंपल्या. तरणाट्या बायल पैलवानांच्या फुडारा खातीर, तांकां सुरक्षीत दिसचें म्हूण हांव खेळटा. तेच खातीर हांव जंतरमंतराचेर आंदोलना खातीर बशिल्लें आनी तेच खातीर हांगा आॅलिम्पीकाक आयलां.” अशी प्रतिक्रीया विनेशान भारतीय पैलवान बजरंग पुनिया हाचे कडेन कांय दिसां पयलीं उक्तायिल्ली.
हरियाणाच्या विनेशान राष्ट्रकूल आनी एशियाडांत कुस्तींत भांगरां पदकां जिखल्यांत. ताचो बापूय राजपाल होय पेलवान. तरणाटे पिरायेर तो संवसाराक अंतरलो. आपणाक 32 व्या वर्सा विधवा जाल्ले आनी उपरांत कॅन्सराच्या दुयेंसा कडेन आनी समाजा कडेन लढिल्ले आपले आवय पसून स्फूर्त मेळटा, अशें विनेश सांगता. राष्ट्रीय पैलवान महावीर फोगाट हो ताचो काका. गीता, रितू आनी बबीता ह्यो चुलत भयणी. त्योय पेलवान. तांचेर दंगल हो सिनेमाय आयला. सोमवीर राठी ह्या पैलवाना कडेन विनेशाचें स वर्सां पयलीं लग्न जालां.
वजनान विनेशाक धोबीपछाड (कुस्तींतलो एक डावपेच) घाला. राती भितर ताचेर ही वायट वेळ आयल्या. कारण फायनलींत पावुनय खेळपाक मेळप ना, हाचे सारकें दुसरें व्हडलें दुख्ख ना. भारतीय म्हूण पुराय देशान ताच्या फाटल्यान रावपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
