भांगरभूंय | प्रतिनिधी
लंडन, खबरां संस्था ः मानसीक भलायकेच्या समस्यांनी त्रासांत आशिल्ल्या लोकांक सैमाच्या सांगतान रावप फायद्याचे थारता, अशें एका अहवालातल्यान स्पश्ट जालां. हो प्रयोग सरकाराच्या मजतीन 8 हजार लोकांचेर केलो. हे लोक कांय तरेचे मानसीक समस्यांनी त्रासांत आशिल्ले. ह्या सगळ्यांक उपचारा खातीर कसलेंच वखद दिवचे परस सैमांत भोंवपाक वचपाक, सामुदायिक बागकाम करपाक, झाडां लावपाक, रानांतल्या तळ्यांत पेंवपाचें, अशें उपाय सांगलें. बरे भलायके खातीर इतले व्हड प्रमाणांत लोकांक एकठांय हाडून जोडप हो संवसारांतलो पयलो प्रयोग आशिल्लो. ताका खूब बरो प्रतिसाद मेळ्ळो. प्रकल्पा कडेन संबंदीत आशिल्ल्या लोकां मदीं सुखाची पातळी राष्ट्रीय सरासरी परस चड आशिल्ली.
चिंतेची पातळी नेटान उणी जाली.
अहवाला प्रमाण ह्या प्रकल्पांत दर एकल्याचेर सरासरी 55 हजार रुपया खर्च जाले. मानसीक भलायकेचेर उपचार करपा खातीर खर्च केल्ल्या व्हड रक्कमे परस हो खर्च खूब उणो आसा. 2020 वर्सा सावन अशें सात ग्रीन ॲडव्हाइस पायलट प्रोजेक्ट्स आयोजीत केल्यात.
हे येवजणेची लेखिका एक्सेटर विद्यापिठाची प्राध्यापिका रुथ गार्सायड म्हणटा, ‘मानसीक भलायकेच्यो समस्या आशिल्ल्या लोकांक ग्रीन सोशल प्रिस्क्रिप्शन वा ग्रीन सल्ले खूब उपेगी पडटा अशें आमकां दिसलें. ह्या प्रकल्पांत वांटो घेवन भलायकेचो फायदो मेळिल्ल्या एका मनशान सांगलें की वखदां घेवपा परस सैमाच्या सांगतान रावप खूब बरें.
मानसीक वा शारिरीक भलायकेची खंयचीय समस्या आसल्यार सैमाक लागीं गेल्यार आमकां फायदो मेळटा. ह्या प्रकल्पाक लागून इंग्लंडांत भलायकेचेर जावपी खर्चांत व्हड प्रमाणांत बचत जावंक शकता. गोडेंमूत, रगतदाब, उदासीनतायेचें प्रमाण उणें जावं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
