भांगरभूंय | प्रतिनिधी
पणजी : वक्फ विधेयकाचे लाव तशेंच ताची गरज हाचे विशीं प्रदेश भाजप अध्यक्ष दामू नायक हांणी आर्चबिशप कार्डीनल फिलीप नेरी फेर्रांव हांचे कडेन चर्चा केली. ह्या वेळार आदले आमदार सिद्धार्थ कुंकळयेंकार हाजीर आशिल्ले.
प्रदेश भाजप अध्यक्षपदाचेर निवड जाले उपरांत पयलेच खेपे दामू नायक हांणी आर्चबिशपांची भेट घेतल्या. वक्फ विधेयका सयत राज्याची उदरगत तशेंच शिक्षणा विशीं चर्चा जाली अशी म्हायती दामू नायक हांणी दिली. वक्फ विधेयकाक चर्चीन तेंको दिवचो. हें विधेयक लावकारी आसा, ही गजाल आर्चबिशपाक पटोवन दिल्या, अशें तांणी सांगलें.
वक्फ विधेयकाचेर देशांतली बिशप कॉन्फरन्स अधिकृत निर्णय जाहीर करतली. हें विधेयक योग्य आशिल्ल्याचें मत आर्चबिशपांनी उक्तायलें अशें आदले आमदार सिद्धार्थ कुंकळयेंकार हांणी सांगलें. ते लेगीत चर्चेंत वांटेकार जाल्ले.
डायोसिएशन संस्थेची खूबशीं विद्यालयां गोंयांत आसात. ह्या विद्यालयांक योग्य अशें अनुदान मेळपाची गरज आसा. विद्यार्थ्यांक दर्जेदार शिक्षण तशेंच सुविधा दिवपा खातीर सरकारान अनुदानांत वाड करपाक जाय अशें आर्चबिशपांनी सांगलें.
सेंट फ्रान्सीस झेवीयर कूडदर्शन सुवाळो अंदूं येसस्वी जालो. ह्या वेळार सगल्यांत बऱ्यो सुविधा सरकारान तयार केल्यो. देशविदेशांतल्या लाखांनी लोकांनी पोरणें गोंया भेट दिली. आर्चबिशपांनी कूडदर्शन सुवाळ्याच्या आयोजनाची तोखणाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
