भांगरभूंय | प्रतिनिधी
पणजी : जमनी सयत वक्फची मालमत्ता हडप करपांत मंंडळाचे वांगडी, राजकारणी तशेंच हेर उच्च पदांचेर आशिल्ल्यांचो आसपाव आसा. कर्नाटक विधानसभेंत वक्फ मालमत्ते विशीं सादर जाल्ल्या एका अहवालांत कॉंग्रेसीचे राष्ट्रीय अध्यक्ष मल्लिकार्जून खर्गे हांच्याय नांवाचा आसपाव गैरवेव्हार करप्यां मदीं जाला. कायदेशीर प्रक्रियेच्या आधारार हडप केल्ली वक्फची मालमत्ता ताब्यांत घेवन तिचो योग्य विनियोग करपाचे आशिल्ल्याचें भाजपाचे राष्ट्रीय सरचिटणीस आनी खासदार डॉ. राधामोहनदास अगरवाल हांणी सांगलें. गोंयां सयत सगल्या राज्यांनी वक्फ दुरूस्ती कायद्या विशीं जागृताय करतले अशें तांणी म्हणलें.
डॉ. अगरवाल हांणी पणजेच्या कार्यालयांत पत्रकार परिशद घेतली. ह्या वेळार प्रदेश अध्यक्ष दामू नायक, खासदार सदानंंद शेट तानावडे, उपसभापती ज्योशुआ डिसोझा हजर आशिल्ले.
सरकारांतल्या मंंत्री तशेंच आमदारांक वक्फ दुरूस्ती कायद्या विशीं मार्गदर्शन केले उपरांत तांणी पत्रकार परिशद घेतली.
मुसलमान समाजाच्या मागाशिल्लेपणा विशीं सच्चर समितीन केंद्रांत कॉंग्रेसीचें सरकार आसतना अहवाल सादर केल्लो. वक्फ संंपत्तीची लुटमार सुरू आशिल्ल्याचोय उल्लेख अहवालांत आशिल्लो. कॉंग्रेस सरकारान अहवालाकडेन आडनदर करतना मतांं खातीर फकत मुसलमानांंचें तुष्टीकरण करपाचें काम केलें. २००६ वर्सा वक्फकडेन ४ लाख ५० हजार कोटींची संंपत्ती आशिल्ली. योग्य तरेन तिचें मेजणीं, माप काडून जाल्लें जाल्यार ती १२ हजार कोटी रूपया इतली जाल्ली. वक्फ कडेन ६ लाख एकर जमीनूय आशिल्ली. जमीन तशेंच संंपत्तीचो अयोग्य तरेन विनीयोग जाला. वक्फकडेन आशिल्ली जमीन तशेंच मालमत्ता पोर्टलाच्या आधारार जाहीर करतले. बेकायदो हडप केल्ली जमीन आनी मालमत्ता ताब्यांत घेतले. विश्वविद्यालय, प्रशिक्षण केंद्रां, हॉटेलां तशेंच विवीध उपक्रमांं खातीर तिचो तिचो वापर करतले, अशें डॉ. अगरवाल हांणी सांगलें.
कर्नाटकांतल्या अहवालाचेर चर्चा करतलों
वक्फची जमीन आनी मालमत्तेंतल्या गैरवेव्हारा विशीं एके समितीन अहवाल दिला. ह्या गैरवेव्हारांत मल्लिकार्जून खर्गे हांचो आसपाव आशिल्ल्याचो उल्लेख आसा. ह्या अहवालाक सर्वोच्च न्यायालया मेरेन आव्हान दिल्लें. सर्वोच्च न्यायालयान ही आव्हान याचिका भायर मारली. ह्या अहवालाचेर कर्नाटक विधानसभेंत चर्चा जावंक ना. कॉंग्रेस सरकार चर्चा करपाक पळयना. कर्नाटकांत भाजप सरकार सत्तेचेर आयले उपरांत सभाघरांत चर्चा जावन ते प्रमाण कारवायेची प्रक्रीया सुरू जावपाचें आशिल्ल्याचें डॉ. अगरवाल हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
