भांगरभूंय | प्रतिनिधी
नवी दिल्ली, खबरां संस्था ः संसदेच्या संयुक्त समितीन (JPC) सोमारा वक्फ बोर्ड विधेयकांतल्या बदलांक मान्यताय दिली. फाटल्या वर्सा ऑगस्टांत 14 बदल करून हें विधेयक संसदेंत मांडलें. हाचे आदीं भाजपा खासदार जगदंबिका पाल हांणी 44 बदलांचो प्रस्ताव मांडिल्लो, तो विरोधी वांगड्यांनी न्हयकारिल्लो.
प्रस्तावीत वक्फ बोर्ड विधेयकाचेर खोलायेन चर्चा करपा खातीर तें संयुक्त संसदीय समिती कडेन धाडलें. दोन दीस आदीं जाल्ले बसकेंत हाचेर व्हड बोवाळ जालो. हाचे उपरांत विरोधी खासदारांनी समितीचे अध्यक्ष जगदंबिका पाल हांचेर हुकुमशाय कारभार करता असो आरोप केलो. हाचेर बोवाळ करपी 10 खासदारांक त्या दिसा खातीर निलंबीतूय केले. ताचे उपरांत आयज जाल्ले संयुक्त समितीचे बसकेंत सत्ताधारी पक्षान ह्या विधेयका संबंदी मांडिल्ल्या 12 सुदारणांक मंजूरी मेळ्ळी, जाल्यार 44 सुदारणांक न्हयकार दिलो. मंजूर केल्ल्यो 12 सुदारणा सत्ताधारी भाजपा आनी एनडीए आघाडींतल्या हेर इश्ट पक्षांनी मांडिल्ल्यो. जाल्यार विरोधी पक्षांनी मांडिल्ल्यो 44 सुदारणा न्हयकारल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
