भांगरभूंय | प्रतिनिधी
नवी दिल्ली, खबरां संस्थाः शेनवारा सांजेवेळार उसरां राष्ट्रपती द्रौपदी मुर्मू हांणी वक्फ (दुरुस्ती) विधेयकाक मान्यताय दिली. सरकारान नव्या कायद्याविशीं राजपत्र अधिसुचवणी जारी केली. आतां केंद्र सरकार नवीन कायद्याच्या अंमलबजावणेच्या तारखे विशीं स्वतंत्र अधिसुचवणी जारी करतले. २ एप्रिलाक लोकसभेंत आनी ३ एप्रिलाक राज्यसभेंत १२ वरांचे चर्चे उपरांत हें विधेयक (आतां कायदो) मंजूर जालें.
खासदार मोहम्मद जावेद, एआयएमआयएमचे खासदार असदुद्दीन ओवेसी आनी आपचे आमदार अमानतुल्ला खान हांणी नव्या कायद्याक स्वतंत्र याचिकांनी सर्वोच्च न्यायालयांत आव्हान दिलां. हे याचिकेंत म्हणलां, वक्फ सुधारणा कायदो मुस्लीम समुदाया आड भेदभाव करता. हो कायदो मुस्लिमांचे गरजेचे अधिकारय पाळिनात.
हाचेर केंद्रीय मंत्री रिजिजू हांणी म्हणलें, ह्या कायद्याचो उद्देश वक्फ मालमत्तेंतलो भेदभाव, गैरवापर आनी अतिक्रमण थारोवप. ह्या विधेयकाक (आतां कायदो) राज्यसभेंत १२८ वांगड्यांनी फाटबळ दिलां, जाल्यार ९५ वांगड्यांनी विरोध केला. २ एप्रिलाक रातीं उसरां लोकसभेंत तें मंजूर जालें. ह्या काळांत २८८ खासदारांनी समर्थनांत मतदान केलें जाल्यार २३२ खासदारांनी विरोधांत मतदान केलें.
वक्फ विधेयका आड मुस्लीम पर्सनल लॉ बोर्डाचो निशेध
ऑल इंडिया मुस्लिम पर्सनल लॉ बोर्डानवक्फ विधेयकाच्या निशेधान दोनपानांचें पत्र जारी केलें. एआयएमपीएलबीन म्हणलें, आमी सगळे धर्मीक, समुदाय-आधारीत आनी समाजीक संघटनांच्या सहकार्यान देशव्यापी चळवळ राबोवी. ही मोहीम जो मेरेन सुधारणा पुरायेन रद्द जायना. तो मेरेन सुरू उरतली.
पर्सनल लॉ बोर्डान म्हणलें –
वक्फ दुरुस्ती विधेयक हें इस्लामीक मुल्यां, धर्म आनी शरिया, धर्मीक आनी सांस्कृतीक स्वातंत्र्य, सांप्रदायीक सलोखा आनी भारतीय संविधानाच्या गरजेचे रचणुकेचेर गंभीर हल्लो आसा. कांय राजकीय पक्षांनी भाजपाच्या जातीयवादी अजेंड्याक दिल्ल्या फाटबळान तांचो कथीत धर्मनिरपेक्ष मुखवटो पुरायेन उक्तो पडला.
सर्वोच्च न्यायालयांत तिसरी याचिका
आपचे आमदार अमानतुल्ला खान हांणी ह्या विधेयका आड सर्वोच्च न्यायालयांत याचिका दाखल केली. शुक्रारा दोन याचिका दाखल केल्ल्यो. बिहारांतल्या किशनगंजच्या कॉंग्रेस खासदार मोहम्मद जावेद आनी एआयएमआयएमचे खासदार असदुद्दीन ओवेसी हांणी ही याचिका दाखल केल्या.
बिरेस्तारा राज्यसभेंत हें विधेयक मंजूर जाले उपरांत कॉंग्रेस खासदार जयराम रमेश हांणी कॉंग्रेस सर्वोच्च न्यायालयांत वतलों अशें म्हणिल्लें. तामिळनाडूच्या द्रमुकानूय याचिका दाखल करपा विशीं उलयिल्लें.
वक्फ विधेयका आड जायत्या सुवातांचेर मुस्लिम समुदायांच्या लोकांनी निदर्शनां केलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
