भांगरभूंय | प्रतिनिधी
मुर्शिदाबाद, खबरां संस्था: वक्फ कायद्या आड अस्तंत बंगालांतल्या मुर्शिदाबाद, उत्तर २४ परगणा, हुगळी आनी मालदा जिल्ह्यांत हिंसक निदर्शनां जालीं. आतां मेरेन ३ जाणांक मरण आयलें. सुमार १५ पुलीस जखमी जाले. जायत्या वाहनांक उजो लागलो आनी दुकानां आनी घरां फोडलीं आनी लुटमार केली. वक्फ कायद्याच्या निशेधा खातीर राज्यांत १० एप्रील सावन हिंसाचार चालू आसा.
केंद्र सरकारान अस्तंत बंगालच्या हिंसाचारग्रस्त भागांत १६०० केंद्रीय दळाचे जवान तैनात केल्यात. वट्ट १६ कंपन्यो तैनात केल्यात. तशेंच, सुमार ३०० बीएसएफ सैनीक तैनात आसात. हाचे भायर ५ आनीक कंपन्यो तैनात केल्यात. हिंसाचारग्रस्त वाठारांत इंटरनेटाचेर बंदी आसा. कलम १४४ लागू आसा. सुमार १५० लोकांना अटक केल्या.
मरण आयिल्ल्यां मदीं धुलियानच्या बापूय-पुताचो आसपाव आशिल्लो. हिंसक गर्देंतल्यान हरगोबिंद दास (बापूय) आनी चंदन दास (पूत) हांकां मारपेट करून जिवे मारले. ते दोगूय हिंदू देवी-देवंच्यो मुर्ती करताले. शुक्रारा तिसरो तरणाटो फार लागून जखमी जालो. उपचारा वेळार ताका मरण आयलें.
पश्चीम बंगालांतले विरोधी फुडारी शुभेंदू अधिकारी हांणी कोलकाता उच्च न्यायालयांत याचिका दाखल केल्ली, जातूंत केंद्रीय दल तैनांत करपाची आनी हिंसाचाराची एनआयए कडल्यान चौकशी करपाची मागणी केल्ली. उच्च न्यायालयान हिंसाचारग्रस्त वाठारांत केंद्रीय सुरक्षा दळ तैनात करपाचे आदेश दिले.
न्यायमूर्ती सौमेन सेन हांच्या अध्यक्षते खाला खंडपीठान म्हणलें: भायर आयिल्ल्या अहवालांकडेन आपूण आडनदर करपाक शका. हातूंत राज्यांतल्या कांय जिल्ह्यांनी क्रुरताय दिसता. मुर्शिदाबाद सोडून जंय हिंसाचार दिसतलो थंय केंद्रीय सुरक्षा दळ तैनात करचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
