भांगरभूंय | प्रतिनिधी
दुबावितांक अटक जाय मेरेन आंदोलन चालूच दवरपाचो वकिलांचो निश्चेव
भांगरभूंय । प्रतिनिधी
म्हापशें: पर्वरी पुलिसांनी अॅड. गजानन सावंत हांकां मारपेट प्रकरणा कडेन संबंदीत तिनूय गुन्यांव पर्वरी पुलिसांनी गुन्यांव फांट्या कडेन वर्ग केल्यात. ह्या प्रकरणांतल्या पुलिसांक अटक जाय मेरेन हें आंदोलन चालूच दवरपाचो निर्धार वकिलांनी केला. तशेंच प्रधानमंत्र्यांचें भेटीक लागून आंदोलन एक दीस स्थगीत केलां.
पर्वरेच्या शांतीनगरांतले पीक हेवन इमारतींतल्या वादग्रस्त फ्लॅटांत हो प्रकार घडिल्लो. आंदोलक वकिलांनी अॅड. सावंत मारपेट प्रकरणांत ताकतिकेन खुनी हल्ल्याचो गुन्यांव नोंद करचो आनी दुबावितांक अटक करची. तशेंच हें प्रकरण गुन्यांव फांट्या कडेन वर्ग करचे, अशी मागणी केल्ली. ते प्रमाण पुलिसांनी गुन्यांव नोद केलो आनी अॅड. सावंत मारपेट प्रकरण आनी ते संबंदीत हेर दोन मेळून तीन प्रकरणां गुन्यांव फांट्या कडेन वर्ग केल्यात.
शेनवारा दनपारां कांय वकिलांनी गुन्यांव फांट्याच्या उपअधिक्षकांची भेट घेवन प्रकरणां वर्ग जाल्यात काय ना ताची वासपूस केली. पूण संबंदीत पुलीस अधिकाऱ्यांनी अजून प्रकरण हस्तांतरीत करूंक नाशिल्ल्याचें स्पश्ट केलें. ताका लागून ह्या वकिलांनी गुन्यांव फांट्या भायर बसकण मारली.
हें प्रकरण वर्ग केल्ल्याची म्हायती सांजे वेळार आंदोलक वकिलांक दिली, पूण अजून चवकशी अधिकाऱ्यांची नेमणूक करूंक नाशिल्ल्याचें सांगलें. दुबावितांक अटक जाय मेरेन आंदोलन फाटीं घेवचे न्हय, असो निश्चेव वकिलांनी केलो.
मजगतीं, महाराष्ट्र- गोंय अॅडव्होकेट संघटणेचे आदले उपाध्यक्ष तशेंच गोंय आनी सिंधुदुर्ग संघटणांचे मार्गदर्शक अॅड. संग्राम देसाय हांणी गोमॅकाँत उपचार घेवपी अॅड. सावंत हांची भेट घेवन वासपूस केली. तशेंच घडिल्ल्या प्रकाराची म्हायती समजून घेतली.
आंदोलन आयज एक दीस स्थगीत
प्रधानमंत्री गोंय भेटीचेर येता. आमच्या गोंया विशीं देशांत वायट संदेश वच्चो न्हय हे खातीर आमी राज्याच्या हिता खातीर आयतारा एक दीस आंदोलन स्थगीत दवरपाचो निर्णय घेतला. तशेंच सोमारच्यान परतून आमकां न्याय मेळा मेरेन आमी राज्यांतल्या वकील संघटणांनी आंदोलन चालू दवरपाचो निश्चेव केला, अशी म्हायती ह्या आंदोलनाचे फुडारी अॅड. विनायक पोरोब हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
