भांगरभूंय | प्रतिनिधी
फाटल्या शेनवारा ‘वंदे भारत’ ट्रेन गोंयच्यान सुरू जावची आसली. पूण, ओडिसांत जाल्ले ट्रेन दुर्घटनेक लागून ‘वंदे भारता’क पाचवो बावटो दाखोवंक मेळ्ळो ना. आतां ही ट्रेन कोणाक जाय पडली खबर ना. तिची खर्यांनीच गरज आसली काय कितें हो एक संशोधनाचो विशय जावंक येता. ही ट्रेन सकाळची मुंबयच्यान सुटून दनपरां गोंयां पावतली आनी दनपरां गोंयच्यान भायर सरून रातची मुंबय पावतली. फाटीं एकदां बेगीन पावंक जाय म्हणून तेजसाचेर मुंबय वचूंक गेलों. तेजस सिएसटी पावता म्हणल्यार रातचीं अडेज जाल्लीं. जाय आनी बेगीन वचूंक? रेल्वेक उशीर जाल्यार आमी प्रवाशांक अमकी सवलत दितले आनी तमकें दितले म्हणपाची रेल्वेन कितलीय जायरात करूं, प्रत्यक्षांत आमकां अणभव वेगळोच मेळटा. तुमकां कोणूच विचारनात आनी कितेंय विचारल्यार ताची जापूय मेळना. रातचे वेळार तर विचारूंच नाका.
कोंकण रेल्वे दर पावसांत आपणालें वेळापत्रक बदलता. फुडले चार म्हयने ट्रेनी सवकास चलतल्यो म्हणपाची शिटकावणी ते पयलींच दितात. ज्या वाठारांतल्यान कोंकण रेल्वे वता तो सगळो दोंगराळ भाग. दर पावसांत हांगचीं पालसणां कोसळटात. ट्रेनीच्या कंपनान वाठार हालता आनी ताचो परिणाम ह्या पालसणाचेर जाता. पावसांत जमीन मोव जाल्ली आसता आनी कंपन वाडलें तर पालसण कोसळपाचो भंय आसता. हाचे पयलीं अश्यो दुर्घटणा घडल्यात. म्हणून तर कोंकण रेल्वे सगळे तरेची सादुरताय बाळगिता. आनी अशे वेळार ह्याच मार्गावेल्यान सामकी फास्ट वचपी ‘वंदे भारत’ सुरू जाता. ही ट्रेन सुरू करपाकूय बरो म्हूर्त सोदून काडला. पावस दारांत पावला, खंयच्याय खिणाक पावस पडूं येता आनी होच म्हूर्त सादून वंदे भारताक पांचवो बावटो दाखयला. पळेयात केदो विरोधाभास तो. एके वटेन सगळ्या ट्रेनींचो वेग उणो जावपाचो आसा आनी तेन्नाच एक वेगान धांवपी ट्रेन त्याच मार्गावेल्यान धांवतली.
रेल्वेच्या इंजिनीयरांनी हाका मान्यताय दिल्या? तांकां पावसांत कोंकण ट्रेकावेल्यान अती वेगान वचपी ट्रेन चलता? मागीर बाकी ट्रेनींचो वेग उणो कित्याक करतात तर? काय मोदी हांचें सपन साकार करूंक हो अट्टाहास? कितें समजुपाचें आमी? ‘मोदी है तो मुमकीन है’ हें हांगाय लागू जातलें? सैम हें सगळें चलोवन घेतलें? ह्या ट्रेनीक लागून कंपन वाडचें ना आनी पालसण कोसळचें ना? कितेंय दुर्घटना घडल्यार ताची जापसालदारकी कोण घेतलो? वंदे भारत सुरू करपाक होच वेळ कित्याक सोदून काडलो? पावस सोपसर रावंक जाय नासलें? कोणा कडेन मेळत हाच्यो जापो?
तशें पळोवंक गेल्यार कोंकण ट्र्रॅकावेल्यान मुंबय वचपी जायत्यो ट्रेनी आसात. तातूंत आनीक ट्रेनीची गरज नासली. जांकां बेगीन वचूंक जाय तांचे खातीर विमानां आसात. गोंयांत दोन- दोन विमानतळ आसात. जाकां बेगीन वचूंक जाय ते विमानानूच वतले. ते कित्याक वंदे भारताक रावतले? आतां एक वेगळी ट्रेन म्हणून कोणूय पिकनीक बी करीत. पूण, सदांच ते हे ट्रेनींत वचतशें दिसना. तातूंत मुंबय रातचो पावन कांयच फायदो ना. हाचे परस सावथ- सेंट्रल ट्रेकाचेर ट्रेनी आसप गरजेचें काय दिसता. पयलीं वास्कोच्यान मुंबय वचूंक दोन ट्रेनी सुट्टाल्यो. एक सकाळची आनी दुसरी रातची. गोंयकारांक खूब फायदो जातालो त्या ट्रेनींचो. खुबशे गोंयकार बेळगांव, घटप्रभा, मिरज, सांगली, पुणें ह्या वाठारांनी प्रवास करतात. कोल्हापूर, शिरडी वचूंक हे मार्ग बरे पडटात. गोंयांत येवपी भाजी ह्याच ट्रेनींतल्यान येताली आनी सवाय मेळटाली. मिटर गेजची ब्राॅड गेज करचे खातीर ह्यो ट्रेनी बंद केल्ल्यो. ब्राॅड गेज जाली, पूण बंद जाल्ल्यो ट्रेनी अजून सुरू जावंक नात.
ह्यो ट्रेनी सुरू करच्यो म्हणून जायतीं निवेदनां दिवन जालीं. पूण रेल्वेन अजून मनार घेवंक ना. फाटले लोकसभा वेंचणुके वेळार दक्षीण गोंयांत काँग्रेसीचे तिकेटीचेर उबो राविल्ल्या उमेदवारान कुडचड्यार रेल्वे ट्रेकार बसून आंदोलन केल्लें ताची मदीं- मदीं याद जाता. ह्या आंदोलनान ताच्या मतांची टक्केवारी वाडली. तो वेंचुनूय आयलो ताका आतां चार वर्सां जालीं. पूण वेंचून येतकूच तो मतदारांक विसरलो तसोच ट्रेनीकूय विसरलो. आपणें ट्रॅकार बसून आंदोलन केल्लें हें लेगीत तो विसरलो आसूंक जाय. आतां परत एकदां ताका तिकेटीचे वेध लागल्यात म्हणटकूच आतां तरी ताका ट्रेनीची याद जावंक जाय आशिल्ली. पूण अजून तरी ताचे कडल्यान कांयच आयकूंक येवंक ना.
वंदे भारता जाग्यार ह्यो ट्रेनी जर परतून चालू केल्ल्यो जाल्यार ताचो फायदो चड जावपाचो. फकत गोंयकारांकूच न्ही तर हेर राज्यांतल्या लोकांकूय हाचो लाव मेळपाचो. ह्यो ट्रेनी तीन राज्यांतल्यान वतल्यो. गोंय, कर्नाटक आनी महाराष्ट्र ह्या तिनूय राज्यांतल्या लोकांक ह्या ट्रेनीचो फायदो मेळपाचो. खुबशे गोंयकार शिकूंक तशेच कामाक पुण्याक रावतात. जायते लोक साईबाबाचे भेटेक शिरडीक वतात, कितले तरी लोक कोल्हापूर अंबाबाई दर्शनाक वतात आनी गोंयकार तर सदांच खरेदीक बेळगांवी वतात. ते भायर मुदासाक वा आरोग्या नदरेन खूबशे लोक घटप्रभा आनी मिरज वतात. ह्या सगळ्यांक ह्यो ट्रेनी गरजेच्यो. वंदे भारतचो लाव कोणाक जातलो खबर ना. कोंकण ट्रॅकावेल्यान खरें म्हणल्यार रमत गमत वचपी ट्रेनी सुरू करूंक जाय. पर्यटकांक कोंकणांतलें सैम आनी
सोबीतकाय दाखोवचे खातीर असल्या ट्रेनींची गरज आसा. पावसांत तर हांगचे सौंदर्य दोळ्यांत साठोवन घेवपा सारकेंच. वेगान वचपी ट्रेनींतल्यान कितें दिसतलें? हाचेर जरूर विचार जावचो. जें पयर ओडिसाक घडलां तसलें तांडव परत घडचें ना हाचेर लक्ष दिवप भोव गरजेचें.
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
