भांगरभूंय | प्रतिनिधी
पर्वरी इंग्लीश मुळावे शाळेचो वर्सुकी दीस उमेदीन
पणजी : पालक आनी शिक्षकांनी ल्हान भुरग्यां मदीं पुस्तक वाचनाची आवड निर्माण करची असो उलो शिक्षण खात्याची सहाय्यक संचालक फ्रिदा आंद्राद हांणी मारलो. शुक्रारा पणजे फोमेंतो एज्युकेशनल चॅरिटेबल सोसायटीच्या दि पर्वरी इंग्लीश मुळावे शाळेच्या वर्सुकी कार्यावळींत त्यो उलयताले. ह्या वेळार ज्यो लुईस, अचमना लुईस, निवेदिता श्रीवास्तव, नीला जयवंत, डॉ. एडगर डिसोझा, फ्रान्सिको डिसोझा, दिलीप वेर्लेकार आनी हेर हाजीर आशिल्ले. ताचे पयलीं बालवाडी ते चवथेच्या विद्यार्थ्यांनी नाच, गायन, फॅशन शो अश्या जायत्या गजालीं वरवीं आपले कलागूण दाखयले. आंद्राद हांणी सांगलें, सध्याची ल्हान भुरगीं मोबायलांत अदीक व्यस्त आसतात. तांची ही संवय बदलप गरजेचें. तांणी पुस्तकां कडेन इश्टागत केल्यार तांकां ज्ञान मेळटलें. तशेंच जिणेंत मुखार सरपा खातीरय पुस्तकां उपेगी थारतलीं. पुस्तकां आसल्यार भुरगीं मोबायलांत चड वेळ घालोवचीं ना. आयज विद्यार्थ्यांनी सादर केल्ले कला गूण प्रदर्शनांतल्यान तांचीं निश्पापपणां, पारदर्शकताय वांगडा शिस्तूय पळोवपाक मेळ्ळी. हांगा सादर केल्ले दरेके कलेंत कितें तरी संदेश दिलो, ही गजाल म्हत्वाची. हे खातीर शिक्षकांकूय परबीं भेटोवप गरजेचें.
नीला जयवंत हांणी सांगलें, शाळे वतीन दरवर्सा असो उपक्रम राबयतात. आमी शिक्षणीक अभ्यासक्रमा सयत अशे तरेच्या कार्यावळींतल्यान विद्यार्थ्यांच्या कलागुणांक वाव दितात. हातुंतल्यान तांकां आपली कुशळटाय विकसीत करपाची संद मेळटा. आयज विद्यार्थ्यांनी केल्ले कार्यावळींतल्यान तांची ऊर्जा पळोवपाक मेळ्ळी. कार्यावळीची प्रॅक्टिस जानेवारी म्हयन्या सावन सुरू आशिल्ली. हे खातीर शिक्षकांनीय खूब परिश्रम घेतले. भुरग्यांक बरें शिक्षण दिवन फुडाराक देशाचो जापसालदार नागरीक करप ही आमची जापसालदारी आसा.
बर्या शिक्षणा खातीर बांदील
फोमेंतो मिडियाचेर संचालक ज्यो लुईस हांणी सांगलें, हे शाळेचे खुबशे आदले विद्यार्थी आयज बर्या पदार काम करतात. ही आमचे खातीर अभिमानाची गजाल. फोमेंतो एज्युकेशनल चॅरिटेबल सोसायटी वतीन आमी बरें शिक्षण दिवपा खातीर बांदील आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
