भांगरभूंय | प्रतिनिधी
तुमच्या भुरग्याची पिराय स वर्सां परस उणी आसा. ताका शांत दवरप, जेवण भरयतना वा मनोरंजन करतना मोबायला वयले व्हिडियो दाखोवप हें सदचेंच जालां. पूण हें करप्यां खातीर ही खास शिटकावणी. ब्रेन इंज्युरी तज्ञ आनी न्यूराेसायकाॅलाॅजिस्ट डाॅ. अल्वारो बिलबाओ हांणी एक दावो केला. तांच्या म्हणण्यां प्रमाण स वर्सां परस उणे पिरायेच्या भुरग्याचो स्क्रीनी कडेन संपर्क आयल्यात तो चिडचीड करपाक शकता. ताची एकाग्रताय उणी जाता. स्मरणशक्त दुबळी जाता. इतलेंच न्हय, तर मन आनी मेंदवांतल्यो आदल्यो यादीय धूसर नोंद जातात. आपणाक कसली आवड आसा हें थारावपाकूय ताका अडचणी येतात.
स्क्रीनीक चड वेळ दितकच भुरग्यां मदीं अटेंशन डेफिसिट डिसआॅर्डर, डिप्रेशन, अॅडिक्शना सारक्यो समस्या निर्माण जातात. ताचो भुरग्याच्या व्यक्तीमत्वाचेर दीर्घकाळ परिणाम जाता. ताकाच लागून भावनिक आनी बौद्धीक रूपान विकसित जाले उपरांतूच भुरग्यांच्या हातांत स्क्रीन उपकरण दिवपाक जाय.
जायते आवय-बापूय भुरग्यांचें लक्ष हेर कडेन ओडपाक तांकां मोबायल पळोवपाक उर्बा दितात. हें म्हणजे भुरग्यांक 800 सीसीची मोटारसायकल दिवपा सारकें. तांकां पयलीं ती गाडी चलोवपाक तरी शिकुदी. भुरग्याची शारिरीक सुरक्षा, सुरक्षीत वातावरण आनी आवय- बापूय हांचे वरवीं पोशण जावंक जाय. २ ते ५ वर्सांच्या भुरग्यां मदीं शिक्षणा भायर स्क्रीन टायम सप्तकाक १ वर आनी शिक्षणीक व्हिडियो सप्तकांतल्यान ३ वरां परस कमी जाय. १८ ते २४ म्हयन्यांच्या भुरग्याक अदीं मदीं शिक्षणीक व्हिडियो दाखोवं येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
