भांगरभूंय | प्रतिनिधी
गोडेंमूत, कोलेस्ट्रॉल आनी काळजाच्या दुयेंसा प्रमाण केंसांच्यो समस्या वाडतूच चल्ल्या. कांय जाणांच्या केंसांत डँड्रफ (कोंडो) जाता, जाल्यार कांय जाणांचे केंस तुट्टात. मात, जायत्या जाणांक केंस अचकीत धवे जावपाचे समस्येक तोंड दिवचें पडटा. चल्यां मदीं ही समस्या चड दिसून येता. ल्हान वयार केंस धवे जाल्ल्यान फकत लुकूच न्हय तर आत्मविस्वासूय उणो जाता. केंस धवे जावपाच्या भंयान जायते जाण केंसांक मेथी वा कलर घालतात.
जर तुमचे केंस २० ते २५ पिरायेचेरूच धवे जावपाक लागल्या जाल्यार ही चिंतेची गजाल. भलायकी तज्ञांच्या म्हणण्या प्रमाण, ल्हान पिरायेचेर केंस धवे जावपाक लागतात, तेन्ना शरिरांत कितें तरी सारकें ना हें समजचें.
ह्या कारणांक लागून केंस धवे जातात
हार्मोनल असंतुलन
शरिरांतल्या हार्मोनल असंतुलनाक लागून केंसांचेरूय परिणाम जाता. हाका लागून तुमच्या केंसांचें पोंत पिड्यार जाता वा ते ग्रे कलर जावपाक शकतात.
अनुवांशीक कारणां
तज्ञांच्या म्हणण्या प्रमाण, गोडेंमुता प्रमाण केसांची समस्याय अनुवांशीक आसपाक शकता. जर कुटुंबांत केंस धवे जावपाची समस्या आसल्यार कुटुंबांतल्या हेर वांगड्यांचेर केंस धवे जावपाक शकता. ज्या कुटुंबांतल्या पालकांचे केंस बेगीन धवे जाल्यात जाल्यार तांचे फुडले पिळगेचेर काळा प्रमाण केंस धवे जावपाक लागतात.
हीं लेगीत कांय कारणां आसात
चड ताण घेवप
केमिकल हेअर प्रोडक्ट्स
सिगार ओडपाची सवय
सुर्याच्या किरणांनी चड वेळ रावल्यार केंसांचेर परिणाम जाता.
केंस धवे जावपा पसून राखण कशी करची?
केन्ना केन्ना शरिरांत व्हिटॅमिन बी १२ ची पातळी उणी जाता, ताका लागून केंस धवे जातात, अशें भलायकी तज्ञांचें म्हणणें. केंस निरोगी आनी काळे उरपा खातीर व्हिटॅमीन बी १२ आशिल्ले जिन्नस खायात. तुमच्या आहारांत तातयां, आवाकाडो, फ्लेक्ससीड्स आनी दुदयाच्या बियांचो वापर करात. तशेंच केंसांची योग्य तरेन जतनाय घेवप गरजेचें. तशेंत ल्हान पिरायेचेर केंस धवे जावपाक लागल्यार रोखडेंच दोतोराक मेळचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
