भांगरभूंय | प्रतिनिधी
मुख्यमंत्री डॉ. सावंत हांची कळंगूटच्या कार्यकर्त्यांक हमी
भांगरभूंय । प्रतिनिधी
म्हापशें : देशाच्या स्वातंत्र्याच्या शेंकडो महोत्सव वर्सां मेरेन म्हणल्यार फुडलीं 25 वर्सां भाजपाचें राज्य आसतलें. हें सपन पुराय करचे खातीर प्रधानमंत्री नरेंद्र मोदी आनी पक्ष कार्यकर्ते वावर करतात. कळंगूटे लेगीत आमदार मायकल लोबो हांणी पक्षाचें काम मनां सावन वाडोवपाची गरज आसा. तांच्या ह्या वावराची दखल पक्ष योग्य वेळार घेतलो, तांकां योग्य न्याय आनी पद दितलो, अशी हमी मुख्यमंत्री डॉ. प्रमोद सावंत हांणी कळंगूटच्या पक्ष कार्यकर्त्यांक दिली.
बिरेस्तारा सांजे वेळार कळंगूटे आयोजीत नव्यान निवड जाल्ल्या भाजप मंडळ समितीक परबीं दिवपाच्या सुवाळ्यांत मुख्यमंत्री उलयताले. ह्या वेळार प्रदेशाध्यक्ष दामू नायक, आमदार मायकल लोबो, उत्तर गोंय जिल्हो अध्यक्ष दयानंद कारबोटकार, कळंगूट मंडळ अध्यक्ष समीर चोडणकार आनी हेर पदाधिकारी हाजीर आशिल्ले.
सध्या देशांतल्या 28 तल्या 21 राज्यांनी भाजपाचें सरकार आसा. पुराय देशांतल्या लोकांक मोदी हांच्या फुडारपणाचेर विस्वास आसा. फट उलोवप्यांचीं फटींगपणां लोक परतून आयकून घेवचे नात. गोंयांतले विधानसभा वेंचणुकेक अजून दोन वर्सांचो काळ आसा. मात ते आदीं आतां जिल्हो पंचायत वेंचणुको आसात, ताची तयारी पक्षान चलयल्या, अशें मुख्यमंत्र्यान सांगलें. आमचें सरकार लोकांक जसो मोग दिता, तसोच मोग लोकां कडल्यान आमकां मेळप अपेक्षीत आसा. कळंगूटे लेगीत पक्ष घटमूट करपाक जाय. तें काम आमदार लोबो हांणी करचें. लोबो हांच्या वावराची म्हायती गृह मंत्री अमीत शाह हांकां लेगीत आसा. ताका लागून तांच्या मंत्रीपदाचो हुस्को कार्यकर्त्यांनी करचो न्हय, अशें मुख्यमंत्री डॉ. सावंत हांणी सांगलें.
मुख्यमंत्र्यां फाटल्यान ढाल कसो उबो : मायकल लोबो
2027 चे विधानसभा वेंचणुकेंत 27 परस चड सुवातो भाजपाक मेळच्यो हे खातीर आपूण मुख्यमंत्र्यां वांगडा आसा. ह्यो सुवातो हाडचे खातीर आपूण मुख्यमंत्र्या फाटल्यान ढाल कसो उबो रावतलों, अशें असावासन मायकल लोबो हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
