भांगरभूंय | प्रतिनिधी
तिगांच्यो कुडी सांपडल्यो: व्हावून गेल्ल्यां मदीं तीग जाणां भुरगीं
लोणावळा, खबरां संस्था: पुण्या लागसारा आशिल्ल्या लोणावळाच्या भुशी धरणाच्या घसघश्याचेर काल एकाच कुटुंबांतले पांच जण व्हावून वचपाची घडणूक घडली. तांतल्या तीग जाणांच्यो कुडी सांपडल्यात जाल्यार दोगांचो सोद चालू आसा. व्हांवून गेल्ल्या पांच जाणां मदीं तीग जाणां भुरगीं आसात.
कशी घडली घडणूक
भुशी धरण सध्या भरून व्हांवता. हांगा पर्यटकांची बरीच गर्दी जाल्या. आयतारा अन्सारी परिवार भुशी धरण वाठारांत पर्यटना खातीर आयिल्लो. रानांतल्यान येवपी घसघश्याच्या खडपाचेर अन्सारी परिवार न्हातालो तेन्ना अचकीत प्रवाह वाडलो. तातूंत धा जाण आडकले. तांतल्या पांच जाणांक भायर काडपाक येस आयलें. जाल्यार पांच जाणां उदकांत व्हावून गेलीं.
व्हांवून गेल्ल्यां मदीं शाहिस्ता लियाकत अन्सारी (३६), अमिमा सलमान उर्फ आदिल अन्सारी (१३), उमेरा सलमान अन्सारी (८) हांचो आसपाव आसा. हे घडणुकेंत ह्या तिगांयकूय मरण आयलां. तांच्यो कुडी सांपडल्यात. तशेंच अदनान अन्सारी (४), मारिया अन्सारी (९) ह्या दोगांयचो सोद घेवप चालू आसा. पुण्यांतल्या हडपसर भागांतले खान आनी अन्सारी कुटुंबांतले १७ वांगडी हे पर्यटनाक आयिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
