भांगरभूंय | प्रतिनिधी
विजय मरीन बोट बांदणी प्रकल्पांत दुर्घटणा
दोगांक मरण, पांच जाण गंभीर जखमी
जिल्होधिकाऱ्यान मागयला पुराय अहवाल
भांगरभूंय । प्रतिनिधी
मडगांव : लोटलेच्या विजय मरीन बोट बांदणी प्रकल्पांत शुक्रारा सांजे वेळार भिरांकूळ स्फोट जालो. तातूंत दोगा कामगारांक मरण आयलें जाल्यार चार जाण गंभीर जखमी जाले. तांचेर जीएमसींत उपचार चालू आसात. एकल्याचेर दक्षीण गोंय जिल्हो हॉस्पिटलांत उपचार चल्ल्यात.
रासय लोटलेच्या विजय मरीन बोट बांदणी प्रकल्पांत बोट बांदपाचें काम करतना शुक्रारा व्हड स्फोट जालो. तातूंत सात कामगार जखमी जाले. तातूंतले दोन कामगार चड लाशिल्ल्यान तांकां उपचार चालू आसतना मरण आयलें. चार कामगारांचेर जीएमसींत सर्जरी विभागांत उपचार चालू आसात. तांकांय गंभीर दुखापत जाल्या. तेचवरी ह्या उज्यांत जखमी जाल्ल्या एका कामगाराचेर दक्षीण गोंय जिल्हो हॉस्पिटलांत उपचार चालू आसात.
हे सगले कामगार अलिबाग उत्तर प्रदेशांतले आसात. सध्या वेर्णें वाठारांत ते रावताले. बोटीच्या कामा वेळार टँकाक उजो लागिल्ल्यान ही घडणूक घडली अशें कळ्ळां. तेचवरी वेल्डींग करतना किटाळ्यो उसळिल्ल्यान उजो लागलो, अशेंय कारण सांगतात. जिल्होधिकारी कार्यालया कडल्यान पुराय अहवाल मागयला. ते उपरांत ह्या स्फोटा फाटलें कारण कळटलें. सध्या मायणा कुडटरी पुलिसांनी उज्याचे घडणुकेची नोंद केल्या. घडणुकेची म्हायती मेळटाच मामलेदार, विजय मरीनचे धनी, मायणा कुडटरी पुलीस, वेर्णें उजो पालोवपी दळाचे जवान, आपत्कालीन सेवा पंगड आनी जिल्होधिकारी कार्यालयांतले अधिकारी घडणुकेचे सुवातेर दाखल जाले. दक्षीण गोंय जिल्होधिकाऱ्यांनी हे घडणुकेचो पुराय अहवाल सादर करपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
