भांगरभूंय | प्रतिनिधी
भांगरभूंय । खबरां मेज
पणजीः लोकसेवेंतल्यान हांव केन्नाच निवृत्त जावचो ना. सत्तरी सयत राज्यांतल्या लोकांची जीण समृद्ध करपा खातीर निमणे मेरेन काम करीत रावतोलो. राज्यांत खऱ्या अर्थान स्वराज्य हाडपा खातीर गोंयकारांनी छत्रपती शिवाजी म्हाराजांच्या विचारांनी चलपाक जाय अशें भलायकी मंत्री विश्वजीत राणे हांणी सांगलें. केरी- सत्तरी हांगच्या दोन माड बाजार समिती वतीन शिवजयंती निमतान घडोवन हाडल्ल्या आपल्या भोवमान कार्यावळीतं ते उलयताले.
वाळपयच्या लोकांनी म्हाका तांची सेवा करपा खातीर आमदार म्हणून वेचून दिलां. लोकांक गरिबींतल्यान वयर काडून तांकां जगपा खातीर जाय त्यो साधन सुविधा उपलब्द करून दिवपाचें म्हजें ध्येय आसा. शिवाजी म्हाराजाच्या आदर्शवादाचो म्हजेर प्रभाव आसा. जे लोक दळदीर रेशेखाला जगतात ताकां सगली मजत करपा खातीर हांव वावुरतलों अशें सांगतना वाळपय आनी पर्ये मतदारसंघांतल्या तरणाट्यांक सगल्यो खेळ सुविधा मेळोवन दिवपा खातीर दरेका दोनशे कोटीचे खेळा प्रक्लप उबारपाचें राणे हांणे ह्या वेळार जाहीर केलें.
पर्येची आमदार डॉ देविया राणे हिणे छत्रपती शिवाजी म्हाराजान हिंदवी स्वराज्याची स्थापणूक करून लोकांक बरें प्रशासन दिवपाचो आदर्श घालून दिला अशें सांगलें. म्हाराजांची निर्णय घेवपाची तांक, तांचीं स्वराज्याची संकल्पना, ताचें दुसऱ्यां कडेन वागप हाची देख घेवपा सारकी आसा. शेतकार, कारागीर, कलाकार हाचें विशीं तांच्या मनांत आदर आसतालो. स्वराज्याची उदरगत करपा खातीर ताणी केल्ल्या वावराची आमी सदांच याद दवोरपाक जाय अशें तिणे सांगलें.
ह्या कार्यावळींत म्हायती खात्याचो सहाय्यक म्हायती अधिकारी किरण मुन्ननकार, अंकिता माजीक, केरीचो उपसरपंच भिवा गांवस आनी महादेव पार्सेकार हांचो भलायकी मंत्री विश्वजीत राणे आनी डॉ देविया राणे हांचे हस्तुकीं भोवमान केलो. कार्यावळीक जिल्हो पंचायत वांगडी देवयानी गांवस, सरपंच दीक्षा गांवस, विनोद शिंदे हाजीर आशिल्लो. दोन माड बाजार समितीचो अध्यक्ष गणेश गांवस हाणे सुरवेक सगल्यांक येवकार दिलो. चंद्रकांत परबान कार्यावळीचें सूत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
