भांगरभूंय | प्रतिनिधी
भांगरभूंय । प्रतिनिधी
मडगांवः मडगांव हांगा पंतप्रधान नरेंद्र मोदी हाचे प्रचार सभेक लोक येवचे नात हे भिरातेन मुख्यमंत्री डॉ प्रमोद सावंत हांच्या फुडारपणा सकयल्ल्या गोंयांतल्या सगल्यांत चड भ्रश्ट भाजपा सरकारान गर्दी करपा खातीर विद्यार्थ्यांक सभेक आपयलें असो आरोप प्रदेश काँग्रेस अध्यक्ष अमित पाटकार हाणे केला.
उच्च शिक्षण संचालनालयान जारी केल्ल्या परिपत्रका वरवीं सरकारी खर्चान आयोजीत केल्ल्या मोदी हांच्या प्रचार सभेक विद्यार्थ्यांक हाजीर रावपाची सक्ती केल्ले खातीर पाटकाराण सरकाराचो निशेध केला. भाजपान आतां सगळी शीम हुपल्या. पंतप्रधान नरेंद्र मोदी हाचे सभेक गोंयकार प्रतिसाद दिवचे नात हे कळून आयिल्ल्यान मुख्यमंत्री डॉ सावंत हाणे भौशीक बांदकाम खात्यान तंत्रीक सहाय्यक आनी कनिष्ठ अभियंते म्हणून वेचून काडल्ल्यांकून आपल्या पालकां सयत प्रचार सभेक घेवंन येवून नियुक्तीचीं पत्रां व्हरपाक सांगले असोय आरोप पाटकारान केला.
पंतप्रधानाच्या ह्या भारत उदरगत रॅलींत दक्षीण गोंयचो खासदार फ्रान्सिस सार्दिन हांका आपयलें ना व्हो दक्षीण गोंयांतल्या लोकांचो अपमान आसा. 2019 वर्सा भाजपाक मत दिलें ना म्हणून दक्षीण गोंयांतल्या लोकांचो अपमान करपाची संद भाजपान जाणा जावंन घेतली असो पाटकारान दावो केला. मोदी हांणी गोंयांत आनीक धा सभा घेतल्यो तरी लोकसभा वेंचणुकेंत काँग्रेस गोंयचो दोनूय सुवातो जिखतलो असो विस्वास पाटकार हाणे उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
