लोकोत्सव सगळ्यांक एकठांय हाडटा

भांगरभूंय | प्रतिनिधी

सी. टी. रवीः कर्नाटकांत लोकोत्सव आयोजीत करपाचो विचार

भांगरभूंय । प्रतिनिधी

मडगांवः आमच्या देशांत संस्कृती, भाशा जरी वेगळीवेगळी आसली तरीय भारत एक आसा. लोकोत्सव सगळ्या लोकांक एकठांय हाडटा. अशे लोकोत्सव सगळ्या राज्यांनी आयोजीत करपाक जाय. आपूण आपल्या कर्नाटक राज्यांत लोकोत्सव आयोजीत करपाचो विचार करता, अशें भाजपाचे वरिश्ठ फुडारी सी. टी. रवी हांणी सांगलें.

आदर्श युवा संघान घडोवन हाडिल्ल्या लोकोत्सव 2022 कार्यावळींत रवी मुखेल सोयरे म्हूण उलयताले. ह्या वेळार तांचे वांगडा माचयेर सभापती रमेश तवडकार, समाज कल्याण मंत्री सुभाष फळदेसाय, मंत्री रवी नायक, राज्यसभा खासदार विनय तेंडुलकार, उदकास्त्रोत मंत्री सुभाष शिरोडकार, आमदार दिगंबर कामत, दक्षीण गोंय जिल्हो पंचायत अध्यक्ष सुवर्णा तेंडुलकार, काणकोणचे नगराध्यक्ष रमाकांत नायक गांवकार आनी हेर मानेस्त हाजीर आशिल्ले.

आमदार कामत हांणी सांगलें, लोकोत्सव कार्यावळीचें फक्त काणकोण म्हालांत शिस्तबद्द पददतीन आयोजन जाता. भारत सुपर पावर जातलो जाल्यार दरेका समाजांतल्या मनशाची उदरगत जावपाक जाय. ते खातीर शिक्षणा बगर पर्याय ना. सभापती तवडकार हांणी काणकोण म्हालांत बलराम शिक्षण संस्था सुरू करून बरें शिक्षण दिवपाचें काम केलां.

मंत्री फळदेसाय हांणी सांगलें, लोकोत्सवाच्या माध्यमांतल्यान कुशळटाय आनी उर्बा दिवपाचें काम केलां. आदिवासी समाजांतलो खंयचोच विद्यार्थी पयशांक लागून शिक्षणा पासून पयस उरपाक जायना. शिक्षणा वांगडाच सगळ्या मळाचेर आदर्श निर्माण करपाचें काम लोकोत्सवाच्या माध्यमांतल्यान केलां. सभापती तवडकार हांचें फुडारपण आदर्श घे सारकें आसा, अशें कामत हांणी सांगलें.

मंत्री शिरोडकार हांणी सांगलें, लोकोत्सव पळोवन आपूण भारावलां. अशा लोकोत्तसवाच्या माध्यमांतल्यान लोककलेचें तशेंच संस्कृतीचें संवर्धन जाता. काणकोण म्हाल पर्यटना खातीर पयल्या नंबरा वयलो म्हाल जावचो, अशी आस्त तांणी उक्तायली.

मंत्री नायक हांणीय आपले विचार मांडले.

सभापती तवडकार हांणी सांगलें, फुडल्या 50 म्हयन्यांत काणकोणां खातीर बरीं कामां करपाचो आपलो विचार आसा. 2030 मेरेन काणकोणां एकूय मनीस गरीब उरपाक जायना.

ह्या वेळार विवीध मळांचेर बरी कामगिरी केल्ल्या मानेस्तांचो सी. टी. रवी हांचे हस्तुकीं सत्कार केलो. हे कार्यावळींत गोंयच्या शाळांतल्यान आयिल्ल्या विद्यार्थ्यांनी नाच, धालो, फुगडी सादर केली. अंकुश गांवकार हांणी उपकार मानले.

लोकोत्सवांतले सत्कार मुर्ती

भाजपाचे वरिश्ठ फुडारी सी. टी. रवी हांचे हस्तुकीं विवीध मळांचेर बरी कामगिरी केल्ल्या मानेस्तांचो शाल, नाल्ल, मानपत्र आनी यादस्तीक भेटोवन सत्कार केलो. सत्कारमुर्ती मदीं प्रा. राजमोहन शेट्ये, पत्रकार तुकाराम गोवेकार, डॉ. पांडुरंग नाडकर्णी, निखील देसाय, अनिता कवळेंकार, दशरथ रेडकार, नम्रता उलसन, नगरसेवक सायमन रिबेलो, कालिदास मराठे, चित्रपट दिग्दर्शक- निर्माते राजेंद्र तालक, सुरेखा दीक्षित, फा. मायरम बार्रेटो, पी. ए. सुर्यवंशी हांचो आस्पाव आशिल्लो.