भांगरभूंय | प्रतिनिधी
पर्तगाळच्यान कारवार हायवे सोडून जेन्ना आमी लोकोत्सवाच्या निमतान आमोणें गांवांत वचपाक गाडी घुंवडायली, तेन्ना कल्पना लेगीत नासली इतली गर्दी जावपी एक जंबो इवेन्ट अणभवपाक मेळटलो. कितलीं वर्सां हांव कोणा कोणा कडल्यान लोकोत्सवा बद्दल आयकतालों, पूण वचपाचो योग येवंक नासलो.
सुमार सात- आठ किलोमीटर गाडी चलतकच मुखार हारीन उब्यो आशिल्यो गाडयो आनी बसी दिसल्यो. जंय नदर मारता थंय थंय पार्किंग केल्ल्यो मोटारसायकली, स्कुटरी आनी गाडयो दिसताल्यो. गाडयेंतल्यान देंवून मुखार लोकोत्सवाच्या प्रांगणांत भितर सरपाक उत्सूक आशिल्ले लोक एका वेगळेच उर्जेन भारावन चलता चलताच धांवताले. पुलिसांच्या पिल्लुकांनी पार्किंगाचो वांठार गायतालो. बेशिस्त वागपाक पुलीस मनाय करताले. पार्किंग केल्ल्यो गाडयो असुदाय काडूंक मेळच्यो अशे तरेन लावन घेताले. समजता ताका बऱ्या उतरांनी सांगताले. आयकना तांकां कडक समज दिताले. आमी मोन्यांनी पुलीस सांगता तशी गाडी पार्क करून लोकोत्सवाचे दिकेन चलपाक सुरवात केली.
म्हजे सांगाता म्हजो इश्ट संदेश सामंत आनी ड्रायव्हर योगानंद आसलो. मदीं एकदां भोंवता- भोंवता गर्देन घुसलो आनी आमची चुकामूक जाली. तेन्ना आमच्या लक्षांत आयलें की आमच्या फोनाची रेंज गेल्या. ताका सोदता म्हणसर वर देड वर गेलें. फुडल्या वर्सा तुमी भुरग्यांक घेवन वतात जाल्यार भुरग्यांचो हात सोडूं नाकात. जाण्ट्यांक लेगीत सांडल्यार एकामेकांक खंय येवन मेळप हें पयलींच सांगून दवरात आनी गर्देन घुसात. गर्दी न्हय, दर्याच तो लोकांचो !
वाटेच्या दोनूय अर्दांनी खावपा पिवपाचे जिन्नस विकपाचीं दुकानां पळयत जेन्ना आमी मुखेल दरवंट्या मुखार पावले तेन्ना नदर दिपकावपी गर्दी पळोवन म्हजो आवरो उडलो.
राजधानी पणजी शारापासून सुमार शंभर किलोमीटर पयस दोंगराळ भागांत जंय चडांतचड पन्नास घरां आसत अश्या वाठारांत हो एदो व्हडलो जनसमुदाय आनी आकांताचो समारंभ घडोवन हाडप आनी तोवूय सातत्यान तेवीस वर्सां. ह्या कल्पक बुद्धीक मानाचो सलाम. गोंय राज्याचे मानादीक सभापती भौमानेस्त रमेश तवडकार हांचे कल्पनेंतल्यान साकारिल्ल्या ह्या लोकोत्सवाचो आंवाठ खूब मोठो. जंय कसली साधनसुविधा हाताकडेन उपलब्ध ना अश्या रानांत एदें व्हडलें यशस्वी आयोजन करप, गोंयांभायल्या लोकांची रावपाची, च्या तशेंच जेवणाची वेवस्था करप ही सादीसुदी गजाल न्हय. हें शिवधनुष्य. पूण हांगासल्ले युवक आनी आदर्श युवा संघाचे कार्यकर्ते सभापतींच्या मार्गदर्शना खाल ते पेलतात हें वैशिष्ठ्य. तीन दिसांच्या ह्या महोत्सवांत देशाच्या विविध भागांतल्यान आयिल्ले कलाकार आपली लोककला सादर करतात. काणकोणच्या दोंगराळ भागांतले कष्टकरी लोक आपल्या पोरसांत आनी कुळागरांनी पिकपी भाज्यो, फळां, कंदमुळां, घरगुती खाणांचे प्रदर्शन आनी विक्री करतात. सगळें गांवठी. आरोग्याच्या हिताचे. हांगा शेती, विज्ञान आनी तंत्रज्ञान हातांत हात घालून चलतना जाणवले. गोंयकाराची नीज कृशी संस्कृती जाणून घेवपाची इत्सा आसत जाल्यार दर एक गोंयकारान एकदां तरी हांगा भेट दिवंक जाय. भुरग्यांक दाखोवंक जाय. गोंयां भायल्या सोयऱ्यांक दाखोवंक जाय.
आमी नवे पिळगेक गावांकडे आकर्शित करतले जाल्यार गांवांत अशे तरेचे उत्सव जावपाक जाय. गांवच्या मनशाचो स्वाभिमान जागृत करपाचो हो उत्सव. श्रमजीवनाक प्रतिष्ठा मेळोवन दिवपाचो हो उत्सव. स्वताचें शेत, भाट, निसर्ग, गांव आनी लोकजीण हांचे विशीं आदर बाळगुपाचो हो उत्सव. ही खरी गांवची वळख. आयज मेरेन जे लोक आपलो गांव सोडून शाराच्या मार्गाक लागले तांका परते हाडप कठिण. पुण जे अजून गावांत घांस मारून रावल्यात तांचेखातीर बरे रस्ते, बर्यो सुविधा, उच्च शिक्षण गावांतूच उपलब्ध करून दिवप ही खरी काळाची गरज. हें हांगां घडटा अशें म्हाका ह्या महोत्सवाच्या रुपान होलमलें.
लोकोत्सवाच्या निमतान भोवमानेस्त रमेश तवडकार मार्गदर्शनाखाला हांगां उबो केल्लो शिक्षणसंकुल पळोवंक मेळ्ळो. ह्या निवासी शाळेंत सुमार आठशे विद्यार्थी शिकतात. जे भुरगे चड पयसुल्ल्यान येतात तांची रावपाचीय वेवस्था हांगां जाता अशें समजलें. शाळेच्या भायर हजारांनी रोजां फुल्ल्यांत. हीं फुलां वातावरण प्रसन्न करतात. आतां अंदूंच्यान हांगां विज्ञान विशयांत अकरावी बारावीचे वर्ग सुरु जाल्यात अशेंय समजता. खुब खोश्शेची गजाल. भोवमानेस्त रमेशबाब तवडकार आनी तांची घरकान्न सौ. सविता तवडकार ज्यो स्वता एका शाळेच्यो मुख्याध्यापक आसात तांणी गांवगिऱ्या वाठारांतल्या भुरग्यांक तांच्या दारामेरेन शिक्षणाची वेवस्था करुन एक आदर्श काम केला. तांणी उबी केल्ल्या संस्थेचेय नांव आदर्श युवा संघ. ह्या युवा शक्तीचो असो विधायक वावराखातीर उपेग करुन रमेशबाबान गोंयची आनी पर्यायान देशाची व्हड सेवा केल्या. नवी पिळगी शिक्षित जावंची, सुसंस्कारीत जावंची हाचे खातीर हो जो वावर ह्या वाठारांत घडटा तो लागींच्यान पळोवपाची संद अंदूं आयज म्हाका मेळ्ळी.
अंदूं सावन ह्या लोकोत्सवांत ‘साहित्य सृजनोत्सव’ ही पुराय दोन दीस चलपी कार्यावळ जाली. साहित्य होवूय लोकजीणेचोच वांटो. कोंकणी आनी मराठी साहित्यिकांक एकाच माटवांत एकाच माचयेर आस्पावन घेवपाचो विचार खुब बरो. पांच कोंकणी साहित्यीक आनी पांच मराठी साहित्यीकांचोय भोवमान केलो. किसन फडते आनी उत्तम रेडकार हांणी ह्या साहित्य सृजनोत्सवाचे संयोजन केलें. पयलेंच वर्स जाल्ल्यान थोडी धांवपळ आनी धांदल जाली अशें कांय साहित्यीकांनी सांगलें. माटवांत खुब गरमी जाताली. आनी माटोव मात्सो कडेक आसलेल्यान साहित्यीक कार्यावळीक जनसामान्य लोकांचो चड प्रतिसाद मेळ्ळो ना. अशे तरेच्या लोकोत्सवांत सहभागी जावपी लोक मुळांत फेस्ताच्य, जात्रेच्या मुडांत आसतात. देखून फुडाराक अशे तरेचो साहित्य सृजनोत्सव बंदिस्त सभाघरांत घेवपाचेर विचार जावंचो. कारण खंयच्या साहित्यकाराक मुखार रसिक आयकुपाक आसता तेन्नाच सादरिकरण करपाक मजा येता. साहित्य सृजनोत्सवाचे अंदूंचे पयलॆंच वर्स. फुडाराक संयोजक जतनाय घेतले हाची खात्री आसा. अशे तरेचो लोकोत्सव यशस्वीपणान घडोवन हाडपाक आनी तोवूय बी सातत्यान तेवीस वर्सां हीं फकाणाची कामां न्हय. म्हाका ताची कल्पना आसा. आदर्श युवा संघाचे युवा तशेंच महोत्सवांत आपलें योगदान दिल्ल्या सगळ्या वावुरप्यांच्या कश्टांचे चीज जावं.
उदय नरसिंह म्हांबरो
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
