भांगरभूंय | प्रतिनिधी
-लोकायुक्त नाशिल्ल्यान सदच्यो सुनावण्यो ठप्पपणजी : फाटले म्हयनो भर लोकायुक्तपद रितें आशिल्ल्यान कामकाज ठप्प जालां. सदच्यो सुनावण्यो बंद जाल्यात. लोकायुक्तां कडेन आशिल्ल्या 13 याचिके वयली सुनावणी प्रलंबीत आसा. तशेंच 2 याचिका सुनावणेक घेवच्यो काय ना, हे विशीं निर्णय जावंक ना. लोकायुक्त कार्यालयांतल्यान ही म्हायती मेळ्ळी.
लोकायुक्त अंबादास जोशी हांचो कार्यकाळ 15 डिसेंबर 2024 दिसा सोंपलो. निवृत्त न्यायमुर्ती अंबादास जोशी हांणी 7 मे 2021 दिसा लोकायुक्तपदाचो ताबो घेतलो. 4 वर्सा आनी 7 म्हयने ते लोकायुक्तपदाचेर आशिल्ले. तांणी ताबो घेतिल्लो तेन्ना 43 याचिका प्रलंबीत आशिल्ल्यो. प्रलबीत याचिकां सयत नव्यो याचिका लेगीत तांणी निकालांत काडल्यो. तांच्या कार्यकाळात 2021 वर्सा 3, 2022 वर्सा 32, 2023 वर्सा 4 जाल्यार 2024 वर्सा 13 याचिका निकालांत काडल्यो. वट्ट 52 याचिका तांणी निकालांत काडल्यो. नेमा प्रमाण पिराय जाल्ल्यान पांच वर्सांचो कार्यकाळ पुराय करप तांकां शक्य जाले ना. निवृत्त न्यायमुर्ती पी. के. मिश्रा हांचो कार्यकाळ सोंपले उपरांत अंबादास जोशी हांणी लोकायुक्तपदाचो ताबो घेतिल्लो. अंबादास जोशी हे मुंबय उच्च न्यायालयाचे निवृत्त न्यायमुर्ती आशिल्ले. जुलय 2014 ते जुलय 2019 मेरेन ते महाराष्ट्र प्रशासकी लवादाचे अध्यक्ष आशिल्ले. पी. के. मिश्रा हांचो कार्यकाळ सप्टेंबर 2020 वर्सा सोंपिल्लो. हाचे उपरांंत 7 म्हयने लोकायुक्तपद रितें आशिल्लें. तेन्नाच कोवीड म्हामारीचो काळ सुरू आशिल्लो. आतां लेगीत म्हयनो जालो तरी लोकायुक्तपदाचेर नेमणूक करपा खातीरची प्रक्रिया सुरू जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
