भांगरभूंय | प्रतिनिधी
ट्रॉजन डिमेलोची याचिका निकालांत
पणजी : लोकायुक्तांचे नेमणुकेची प्रक्रीया सरकारा कडल्यान सुरू आसा. 6 सप्तकांत नव्या लोकायुक्तांची नियुक्ती करतले, अशें निवेदन ऍडव्होकेट जनरल देविदास पांगम हांणी एका याचिकेवेले सुनावणे वेळार उच्च न्यायालयांत केलें. ह्या निवेदना उपरांत उच्च न्यायालयान ट्रॉजन डिमेलो हांची याचिका निकालांत काडली.
लोकायुक्तपद रितें आशिल्ल्यान लोकायुक्त कायद्याची कार्यवाय ठप्प आसा. खुबश्यो कागाळी तशेंच याचिका आडकून आसात. बेगोबेग लोकायुक्तांची नियुक्ती करपाची मागणी करपी याचिका ट्रॉजन डिमेलो हांणी उच्च न्यायालयांत केल्ली. ऍडव्होकेट जनरलांच्या निवेदना उपरांत ही याचिका निकालांत काडली.
निवृत्त न्यायाधीश अंबादास जोशी हांचो कार्यकाळ सोंपले उपरांत राज्याचें लोकायुक्तपद रितें आसा. डिसेंबर 2024 वर्सा अंबादास जोशी हांचो कार्यकाळ सोंपिल्लो. सुमार 9 म्हयने लोकायुक्तपद रितें आशिल्ल्यान भ्रश्टाचार संबंदीच्या याचिकांवेल्यो सुनावण्यो ठप्प जाल्यात. बेगोबेग लोकायुक्त नियुक्तीचे आदेश उच्च न्यायालयान सरकाराक दिवचे, अशी मागणी करपी याचिका ट्रॉजन डिमेलो हांणी केली. याचिकादारां वतीन ऍड. अभिजीत गोसावी हांणी युक्तीवाद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
