भांगरभूंय | प्रतिनिधी
आमचो दोतोर अॅपाचें उक्तावण
भांगरभूंय । प्रतिनिधी
दिवचलः सांखळी मतदारसंघांतले कार्यकर्ते, बरे मागपी, इश्ट परिवार हांचे वांगडाच गोंयांतल्या लोकां कडेन सेगीत संपर्कांत रावपाक मेळचें, वेगवेगळ्या येवजण्यांची म्हायती सेगीत अपडेट करपाक मेळची आनी लोकांक मार्गदर्शन करप सोंपें जावचें हे खातीर स्वता फुडाकार घेवन मुख्यमंत्री डॉ. प्रमोद सावंत हांणी आमचो दोतोर ह्या अॅपाचें आयतारा अनावरण केलें.
सांखळेच्या रवीन्द्र भवनांत आयोजीत केल्ले कार्यावळींत भाजप मंडळ अध्यक्ष गोपाळ सुर्लीकार तशेंच सातूय गांवचे सरपंच, नगराध्यक्ष आनी हेर मानेस्त हाजीर आशिल्ले.
आपूण सांखळी मतदारसंघाचें आनी गोंयचें फुडारपण करता. हें करतना कांय वेळार लोकां कडेन संपर्क करतना आडखळी निर्माण जाता, अशें दिसलें. नेमान लोकांनी आपल्याक खूब मोग दिलो, तांचे उपकार फारीक करप कठीण आसा, मात तांच्या सेगीत संपर्कांत रावून तांचे कडेन गजाली मारून, केंद्र तशेंच राज्याच्यो येवजण्यांची नेमान म्हायती दिवन तांचे कडेन संपर्कांत रावपाक मेळचें, हे खातीर अॅप सुरू केला, अशी म्हायती डॉ. सावंत हांणी दिली. ह्या अॅपा वरवीं आपूण लोकां कडेन सेगीत संपर्कांत रावपाक शकता. हे खातीर लोकांनी आपल्यो वेगवेगळ्यो समस्या, आपले प्रस्न तशेंच आपली भुमिका, येवजण्या संबंदांत सेगीत तांणी संपर्कांत रावचें, जे वरवीं नेमान लोकांक वेळावेळार म्हायती दिवप शक्य जातलें, अशें डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
