लोकांनी आनंद घेवचो अशें साहित्य तयार जावंक जाय: विन्सी
भांगरभूंय | प्रतिनिधी
नवोदीत लेखकांनी वाचन करचें. ज्येश्ट लेखकां कडेन संवाद सादचो. आपल्या विशयांचेर भासाभास करची. बरोवन दाखयतकच तें कोणाकूय तपासपाक दिवचें.
नवोदीत लेखकांनी वाचन करचें. ज्येश्ट लेखकां कडेन संवाद सादचो. आपल्या विशयांचेर भासाभास करची. बरोवन दाखयतकच तें कोणाकूय तपासपाक दिवचें.
नामनेचे साहित्यीक विन्सी क्वॉद्रूस हांणी कोंकणी साहित्याच्या मळार मोलाची भर घाल्या. तांकां तांच्या योगदाना खातीर साहित्य अकादमीचो बाल साहित्य पुरस्कार आनी हेर संस्थांचे पुरस्कार फावो जाल्यात. ह्या म्हयन्यांत तांचीं बाल साहित्याचीं आनीक 10 पुस्तकां प्रकाशीत जावपाचीं आसात. तांणी आज मेरेन सतत लिखाण केलां. ह्या निमतान विशाल खांडेपारकार हांणी तांचे कडेन संवाद सादपाचो यत्न केलो तेन्ना तांणी सांगलें.
- तुमी बरोवप खंयचे वर्सा सावन सुरू केलें?
1976 वर्सा हांवें पयलो तियात्र बरयलो आनी तो माचयेर हाडलो. ते उपरांत सुमार 15 तियात्र बरयले आनी तातूंतले सुमार 10 माचयेर हाडले. तांचे प्रयोग केले. ते मजगतीं 1983 वर्सा राजभास चळवळ सुरू जाली आनी तेन्ना कोंकणीचें म्हत्व सांगपी लिखाणां सगळ्यांनी सुरू केलीं. हांवेंय म्हजें योगदान दिलें आनी 1989 वर्सा म्हजो पयलो कथां झेलो उजवाडाक हाडलो.
- सध्या कितें बरोवप चालू आसा?
सध्या हांवें कोंकणी साहित्यांत भुरग्यांचें साहित्य येवचें हाचेर भर घाल्या. ते खातीर हांव ह्या म्हयन्याच्या 18 तारखेर म्हजीं बाल साहित्याचीं 10 पुस्तकां उजवाडाक हाडटां. तातूंतलीं दोन रोमींत आनी 8 देवनागरींत आसात. ते उपरांत आनीक 10 पुस्तकां उजवाडाक हाडपाचें थारायलां.
- तुमकां खंयच्या विशयांचेर बरोवपाक आवडटा?
हांवें आयज मेरेन समाज प्रबोधन करपा विशींच बरयलां. तशेंच कथा आनी निबंद बरोवपाक आवडटात. म्हाका जें आवडटा आनी तातूंतल्यान हांव लोकांक जें बरें दिवंक शकतां तेंच हांव बरयतां. लिखणेंतल्यान लोकांनी आनंद घेवचो अशें साहित्य तयार जावंक जाय अशें म्हाका दिसता आनी हांव तशे यत्न करतां.
- तुमचो आवडटो साहित्य प्रकार खंयचो?
म्हाका बाल साहित्य आनी कथा बरोवपाक आवडटा. कथा बरोवपाची प्रक्रिया सारकी जमतकच हांवें हेर साहित्याच्या प्रकारांत म्हजें योगदान दिलें.
- तुमकां खंयचे विशय हाताळपाक आवडटात?
ज्या विशयांत भासाभास करपाक वाव आसता आनी ज्या विशयांतल्यान लोकांक संदेश दिवंक मेळटा अशे विशय हांव हाताळटां. म्हजें लिखाण वाचून ताचेर प्रतिक्रिया दिवपी कांय लोक आसात. तांची उर्बा म्हाका हें लिखाण करपाक मेळटा.
- तुमकां जाय पूण करपाक मेळना अशे तरेचें लिखाण बरयलां व्हय?
हय! तें म्हणल्यार धर्मीक लिखाण. हांवें रायचे इगर्जेंत 22 वर्सां सेवा दिल्या. त्या वेळार जायत्या पाद्रीं कडेन आनी धार्मीक संस्थां कडेन म्हजो संबंद आयलो. हे खातीर तांकां खंयच आडखळूंक जायना म्हूण हांव ह्या विशयांचेर बरयना. पूण बऱ्या विचाराचो प्रचार करपाक जाय जाल्यार हांव बरयतांच.
- तुमी केन्नाय तुमचें पोरणें लिखाण वाचतात? तें वाचून तुमकां कितें दिसता?
हय. छापून आयिल्लें आनी छापिनासतना उरिल्लेंय साहित्य हांव वाचतां. हांव आदलें लिखाण आनी आतांचें लिखाण हातूंतलो फरक जाणा जावन घेवपाचो यत्न करतां. आदले विशय बरे आशिल्ले, पूण शैली तितली बरी नाशिल्ली आनी कथानक मांडप सारकें जायनाशिल्लें. म्हणल्यार आयचे इतली धार नाशिल्ली.
- आयज – काल लेखकां मुखार कसलीं आव्हानां आसात?
एका लेखकान दुसऱ्या लेखकाचें साहित्य वाचपाक जाय. केन्नाकेन्नाय मेळपाक जाय, हे वरवीं चार गजालींचेर उजवाड पडटा. तशेंच आपूण खंय कमी पडटा तेंवूंय कळटा.
- नव्या बरोवप्यांनी भाशेचो अभ्यास कसो करचो? हाचेर तुजें मत?
आमची भास दिसान दीस प्रगती करीत आसा. हे उदरगती कडेन बरोवप्यान केंद्रींत रावंक जाय. जे बदल घडटात, ते कित्याक घडटात आनी तातूंत आपलें मत कितें हाचें बरोवप्यान विश्लेशण करपाक जाय.
- तुमी बरयतना कितें टाळटात?
दुसऱ्याचो अपमान, अस्तुऱ्यांक आवडचें ना, आनी खंयच्याच धर्मा आड आनी देशा आड बरोवपा विशीं हांव टाळटां.
- नवोदीत लेखकांक तुमी कसलो सल्लो दितले?
नवोदीत लेखकांनी वाचन करचें. ज्येश्ट लेखकां कडेन संवाद सादचो. आपल्या विशयांचेर भासाभास करची. बरोवन दाखयतकच तें कोणाकूय तपासपाक दिवचें. तशेंच तांणी कार्यशाळांनी वांटो घेवप हें म्हत्वाचें. इनामां मेळ्ळीं जाल्यार भुल्लूसून वचचें न्हय. तर बरो वावर करीत रावचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
