भांगरभूंय | प्रतिनिधी
गोवा फॉरवर्डाचो उपक्रम
पणजी: गोवा फॉरवर्ड पक्षा वतीन विजय आमचो आवाज उपक्रम सुरू केला. ते खातीर आमदार विजय सरदेसाय विधानसभेच्या पावसाळी अधिवेशनांत लोकांचे प्रस्न मांडटले. नागरिकांनी आपल्या वाठारांतल्यो समस्या 10 जुलय पयलीं publicsuggestionsgoaforward.in धाडपाचें आवाहन पक्षाचे फुडारी दुर्गादास कामत हांणी केलां. बिरेस्तारा पणजेंत जाल्ले पत्रकार परिशदेंत ते उलयताले. ह्या वेळार मोहनदास लोलयेंकार आनी दीपक कळंगूटकार हाजीर आशिल्ले.
कामत हांणी सांगलें, पक्षान फाटल्या वर्सा लेगीत असो उपक्रम राबयिल्लो. तेन्ना गोंयच्यान खूबश्यो समस्या आयिल्ल्यो. आमदार सरदेसाय हांणी हे प्रस्न अधिवेशनांत मांडिल्ले. अंदूं लेगीत हो उपक्रम राबयतले. तशेंच 29 जून ते 11 जुलय मजगतीं पेडणें ते काणकोण मेरेन भोंवडी करून लोकांच्यो समस्या समजून घेतले. ही भोंवडी 29 जून दिसा मांद्रें सावन सुरू जातली. थंयच्या जिल्हो पंचायत सभाघरांत सकाळीं 10 वरांचेर ही कार्यावळ सुरू जातली.
उपरांत 30 जून दिसा म्हापशेंच्या म्हापशें रेसिडेन्सी, 2 जुलय दिसा गोवा फॉरवर्ड पणजी कचेरी, 3 वेर दिवचले झेड हॉल, 4 वेर वास्को झेड हॉल, 6 वेर काणकोणां पक्ष कचेरी, 7 वेर ईएसएम गलेक्सी कुडचडें, 9 वेर फोंडें विठोबा मंदिर सभाघर, 10 वेर सांगें नगरपालिका सभाघर जाल्यार 11 जुलयाक मडगावां नगरपालिका सभाघरांत निमाणी कार्यावळ जातली. नागरिकांनी आपल्यो समस्या ईमेली वरवीं धाडून दिवपा सयत ह्या कार्यावळींनी हाजीर रावन आपले प्रस्न मांडचे अशें आवाहन कामत हांणी केलां.
मडगांव नगरपालिका वेंचणुकेंत गोवा फॉरवर्ड पक्ष आमदार विजय सरदेसाय हांच्या फुडारपणा खाला सगल्या 25 प्रभागांतल्यान वेंचणूक लडयतले. मडगांव, फातोड्डेंक न्याय दिवपाचो आसत जाल्यार नगरपालिकेंत भोवमात आसप गरजेचें आसा. हे खातीर सगल्या प्रभागांतल्यान वेंचणूक लडोवपाचो निर्णय घेतला अशें दुर्गादास कामत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
