भांगरभूंय | प्रतिनिधी
खासदार सदानंद तानावडे : गटारांचेर एकूय पयसो वगडावचों ना
भांगरभूंय । प्रतिनिधी
दिवचल : खासदार निधीचो वापर गोंयांतल्या विवीध गांवगिऱ्या आनी शार वाठारांत लोकांची गरज वळखून दर्जेदार प्रकल्प हाडपा खातीर करतलों. गटारां बांदपा कातीर एकूय पयसो खर्च करचों ना. लोकांचो पयसो विधायक कामाक वापरपाचो आपणे निश्चेव केला, अशें राज्यसभा खासदार सदानंद शेट तानावडे हांणी सांगलें.
दिवचल नगरपालिके खातीर खासदार निधींतल्यान सुमार 50 लाख रुपया खर्च करून मड्यांगाडी भेटयली. ह्या वेळार आमदार डॉ. चंद्रकांत शेट्ये, जिल्होधिकारी डॉ. स्नेहा गीते, नगराध्यक्ष विजयकुमार नाटेकार, उपनगराध्यक्ष दीपा पळ, मुख्याधिकारी नेहल तळावणेंकार, नगरसेवक आनी हेर मानेस्त हाजीर आसले.
उत्तर आनी दक्षीण गोंय अश्या दोनूय वाठारांत खासदार निधीचो वापर करतात. हे आदीं कांय दर्जेदार प्रकल्प लेगीत चालीक लायल्यात. चड करून शिक्षणीक, भलायकी आनी समाजीक उपक्रमा खाला निधीचो वापर करतात. मसुंडी, अॅम्ब्युलन्स, सेवाभावी वावर, शिक्षणीक संस्थां खातीर, शिक्षणीक उपक्रम आनी हेर माध्यमांतल्यान लोकांक मजत करपाची संद मेळटा हाचें समाधान आसा, अशें तानावडे हांणी सांगलें.
दरेका शारांत नितळसाण तशेंच मास्टर प्लानाच्या माध्यमांतल्यान नियोजन गरजेचें आसा. गोंय आयज देशांत उदरगतीचे बाबतींत गोंय आघाडेर आसा. ही उदरगतीची गती सेगीत फुजें व्हरचे खातीर मुख्यमंत्री डॉ. प्रमोद सावंत बरें काम करता. दिवचल मतदारसंघांत लेगीत डॉ. चंद्रकांत शेट्ये हांच्या मार्गदर्शना खाला उदरगतीक चालना मेळटा, अशें तानावडे हांणी सांगलें.
खासदार निधीटो उपोग समाजहिता खातीर करप हो तानावडे हांचो उपक्रम तोखणायेचो आसा. लोकांची गरज वळखून तांणी खूबश्यो येवजण्यो तशेंच प्रकल्प हातांत घेतल्यात, अशें डॉ. गीते हांणी सांगलें.
लोकांची गरज वळखून खासदार तानावडे हांचे कडेन मड्यांगाडये खातीर विनवणी केल्ली. तांणी दोन म्हयन्यांत ती मंजूर करून लोकां विशीं आशिल्ली तळमळ दाखवन दिली, अशें डॉ. शेट्ये हांणी सांगलें.
दिवचल प्लास्टीक आनी गुटखा मुक्त करप हो आपलो ध्यास आसा. शारांतल्या सगळ्या घटकांनी आपल्याक आदार करचो, अशें नगराध्यक्ष नाटोकार हांणी सांगलें. ह्या वेलार सतीश गांवकार, नारायण बेतकीकार आनी हेरांनी तानावडे हांकां परबीं दिली. ह्या वेळार मड्यांगाडी चालकाचो भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
