लोकांचो कौल

भांगरभूंय | प्रतिनिधी

विरोधी पक्ष स्वतंत्रपणान लडल्यार मात तांकां सोंपेपणी जैत मेळटलें.

जिल्हो पंचायत वेंचणुकेचो निकाल भाजपा युती वटेन लागतलो, हें तशें अपेक्षीत आशिल्लें. कारण तांचे 33 आमदार आसात. हे खेपे एकट्या भाजपाक 29 जागे मेळ्ळ्यात. मात फाटले खेपे परस मतांची टक्केवारी देंवल्या. विरोधी काँग्रेस युतीक आदले परस चड जागे मेळ्ळ्यात. गोवा फाॅरवर्ड, आरजी, आपाकूय चिमटीभर जैत मेळ्ळां.
विरोधी पक्षांनी भाजपा आड आवाज काडलो तरी मतदारांनी तो काना-मनार घेवंक ना. आमच्या डबल इंजिनाचेर गांवगिऱ्या मतदारांनी विस्वास दवरलो. मशिना बदला मतपत्रिका वापरून मतदान जालें, तरीय आमी जिखले, असो चिमटो मुख्यमंत्र्यान काडला. इव्हीएम मशिनाक लागून भाजपा जिखता अशें फाटलीं बरींच वर्सां देशभरांतले विरोधक म्हणटात. मात, ह्या निकालान त्या दाव्यांतली हवाच काडून घेतली. उत्तर गोंयांत काँग्रेस तर दक्षीणेंत भाजपा दुबळी दिसली. काय कडेन काठार पास जाली. फुडली विधानसभा वेंचणूक आमी व्हड मतांनी जिखतले, असो विस्वास भाजपान उक्तायला खरो, पूण तांकां बरोच घाम गळोवचो पडटलो, अशें कालचे निकाल पळयल्यार जाणवता. विरोधी पक्ष स्वतंत्रपणान लडल्यार मात तांकां सोंपेंपणी जैत मेळूं येता.
आदल्या तेंपार काँग्रेस एकहाती जिखताली. तांकां टक्कर दिवपाक भाजप आनी इश्ट पक्षांची युती जाली आनी वेंचणुकां फाटल्यान वेंचणुको जिखत तांणी कदेलाचेर ताबो मेळयलो. मोग आनी झुजा प्रमाण राजकारणांतूय सगलें माफ आशिल्ल्यान साम, दंड, भेद वापरून विरोधी पक्ष खिळखिळे केले. कांय कडेन विरोधक स्वता जावन सत्ताधारी पक्षांत गेले. उपरांत विरोधकांनी इंडी आघाडी केली. मात राजकारणाक हालीं तेंपार वेवसायाचें स्वरूप आयिल्ल्यान (कोणे रागार जावचें न्हय) बऱ्याच म्हत्वाकाक्षी फुडाऱ्यांनी तडजोड, खालतेंपण घेवपाक न्हयकार दिलो आनी ही इंडी आघाडी सुरू जाता म्हणसर थंडावली. गोंयांतूय ‘हाथो में हाथ, चले एक साथ’ जाल्लें, मात गंभीर आरोप जाले… आनी सोयरीक जावचे पयलीं घटस्फोट जालो. नेमको हाचोच फायदो भाजपा युतीक कांय प्रमाणांत जाला. विधानसभा वेंचणुकेंत युती जातली, अशें विरोधक म्हणटात. ती जाली आनी विरोधक सध्याच्या पक्षांतूच उरले जाल्यार ते भाजप- मगो युतीक टक्कर दिवपाक शकतले. पूण ते खातीर तळागाळांत संघटणा, निसुवार्थी, पदरमोड करपी वावुरपी तयार करचे पडटले. सोशल मिडियाचेर व्हिडियो घालून मतदार आकर्शीत जातातूच अशें ना.
काल 20 बायलो वेंचून आयल्यात. तांकां तांच्या घोवांनी स्वतत्रपणान राजकारण करपाक दिवंक जाय. सगलो कारभार आमदार वा तिचो घोवूच करता, असलो प्रकार जावचो न्हय. जिल्हो पंचायतीची म्हयन्याक एक तरी बसका जावची. तांणी अधिकारूय वाडोवन घेवचे. रस्ते, उदक, वीज, भलायकी सुविधा हांचे कडेन लक्ष दिवचें. सैम, दोंगर, न्हंयो, दर्यावेळो, गांवपण सांबाळचें. सरकारी येवजण्यो लोकां मेरेन पावोवच्यो. आमदार सांगता तशी तकली हालोवपी लोकप्रतिनिधी मात नाकात.
आयच्या नव्या मतदाराची मानसिकताय बदल्ल्या. वैचारीक भुमिके बदला तो वास्तववादी, आकांक्षावादी जाला. ताका राजकी तत्वज्ञाना परस ब्रॅण्ड म्हत्वाचो दिसता. सोशल मिडियाचेर जें कितें झळकता तें पळोवन तो विस्वास दवरता, खोलायेन अभ्यास करपाक वचना. ताका कडक, धाडसी फुडारपण जायशें दिसता. ताचे दीर्घ काळाचे परिणाम कितें आसतले, हाचो हो नवो मतदार विचार करताच अशें ना. देशांतलें विरोधी फुडारपणूय आतां नाशिल्ल्यांतच जमा आसा. फुटीर, भ्रश्ट लोकप्रतिनिधींक मतां मेळटात, ही नैतीक घसरण न्हय, तर मतदारांची बदलिल्ली अपेक्षा. जाचे कडेन सत्ता तो म्हजो, मागीर तो कसोय आसूं, असोय सुवार्थी विचार करपी मतदार वाडल्यात. नैतिकताय, तत्वां परस लोकप्रतिनिधी कामां करता काय ना, हाचेर मतदार भर दिवपाक लागल्यात. कालाय तस्मै नमः