भांगरभूंय | प्रतिनिधी
मडगांव: राज्यांतल्या सगल्या जिल्लो पंचायत मतदारसंघांनी लोकांच्यो बसका घेवन लोकांचीं मतां लक्षांत घेवन पक्षाचो जाहीरनामो तयार करतले. लोकांच्यो समस्या आनी मतां जाणून घेतात. खंयच्या उदरगतीच्या कामां खातीर खर्च करपाक जाय, हें जाणून घेतले. तशेंच, जिल्लो पंचायत वांगड्यांनी केल्ल्या उदरगतीच्या कामांच्या आधाराचेर विधानसभा वेंचणूक मतां मागतले, अशें आमदार व्हेंझी व्हिएगस हांणी मडगांवां पत्रकार परिशद घेवन स्पश्ट केलें.
जिल्लो पंचायत वेंचणुकेंत आम आदमी पक्षाचो जाहीरनामो हो लोकांच्या मतां प्रमाण तयार करतले. तांणी सांगलें, आतां मेरेन लोकां वांगडा जाल्ले बसकेंत तरणाट्यांनी बेरोजगारीचो मुद्दो खरपणान मांडलो. पयशे दिवन नोकर्यो विकतात. योग्य उमेदवारांक संद मेळना. ज्येश्ठ नागरिकांक वेळार येवजणेचे पयशे मेळनात, तशेंच डीडीएसएसवाय कार्डाचें नुतनीकरण वेळार जायना, अशें व्हेंझी हांणी म्हणलें.
वेंचणुकेंत मतदार राजा आसता, हाका लागून लोकांमदीं वचून लोकांचो जाहीरनामो तयार करतले. हे बसकेंतल्यान लोकांच्यो समस्या जाणून घेततात. जिल्लो पंचायत वेंचणुकेंत ’आप’च्या उमेदवारांक वेंचून हाडपाक मतदारांनी सहकार्य करचें. जिल्लो पंचायत वांगड्यां कडल्यान जावपी काम पळोवन फुडले वेंचणुकेंत ’आप’क सहकार्य करचें. ’आप’ उदरगतीच्या कामांचें राजकारण करता, उदरगतीच्या कामांचेर मतां मागता, अशेंय तांणी स्पश्ट केलें. बाणावले, कोलवा आनी हेर सुवातांचेर बका घेतल्यो, दोन दिसांनी दरेकी चार बसका जाल्यो. हे बसकेंतल्यान लोकांचीं मतां जाणून घेवन, तांकां कसल्यो सुविधा जाय, हें जाणून घेतात आनी तांचो आसपाव जाहीरनाम्यात करतले, अशेंय तांणी सांगलें.
हेर उमेदवारांनी कितें म्हणलें?
ह्या वेळार हाजीर आशिल्ले जोसेफ पिमेंता हांणी, आम आदमी पक्षा वतीन ते परत जिल्लो पंचायत वेञचणूक लढयता, लोकांचीं मतां जाणून घेवन जाहीरनामो तयार करतात. इसाका फर्नांडीस हांणी, तांणी असोळणा सरपंच म्हणून काम केलां, ’आप’ पक्षा वतीन वेळ्ळी मतदारसंघांतल्या जिल्लो पंचायत वेंचणूक लढटा. मतदारांनी मत प्रदर्शन करून हे खातीर सहकार्य करचें, अशें तांणी सांगलें.
आंतानिओ फर्नांडीस हांणी, तांणी तीन फावटी पंचायत वेंचणूक लढोवन त्यो जिखल्या. दोन फावटीं सरपंच आनी एकदां उपसरपंचपदार काम केलां. ’आप’चें काम पळोवन पक्षप्रवेश करीत जिल्लो पंचायत वेञचणूक लढटात आनी लोकांनी ’आप’क फाटबळ दिवचें, असो उलो तांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
