भांगरभूंय | प्रतिनिधी
आज आपल्या मतदारसंघ आनी लोकांचे प्रस्न, विकासाचे नदरेंतल्यान गांवगिऱ्या वाठारांत किते जाय ताची आमदार म्हणून तांकां जाणीव आसा.
आपलो मतदारसंघ कशे तरेन आनीक विकसित करचो. बारीक- बारीक प्रस्न कशे सोडोवप, लोकांच्यो समस्या कश्यो हाताळप, सरकारी पयसो कसो विकासा खातीर वापरप हें आमदार सौ. देविया राणे हांचे कडल्यान शिकपा सारकें. पयले फावट ती आमदार जाल्या, मात तांकां प्रत्येक विशयाचो बारीक अभ्यास आसा. एखादो विशय हातांत घेतलो काय तो सुट मेरेन सोडप ना, हें तांचें ध्येय. त्यो स्वता मतदारसंघांत सगल्या मतदारांक मेळटात. लोकांचे विशय समजून घेतात.
फुडाऱ्याक फक्त राजकी फाटभूंय आसली म्हणून जायना. राजकारण आपल्या काम, कश्ट आनी निश्ठा ह्या गुणांचेर सिद्ध करचें पडटा. तें आमची आमदार सौ. दिव्या विश्वजित राणेसाहेब हांणी सिद्ध केलां. यौग्य आमदार कसो आसचो हाची प्रचिती तांचें कार्य पळोवन येता.
आमी हेर मतदारसंघांतल्या खूब आमदारांचें कार्य पळयलां. तांकां शिकपाक पांच वर्सा लागतात. मात फक्त चार वर्सां भितर मॅडमीन विधानसभा गाजयली. प्रत्येक पंचायतीच्यो गरजो, समस्या तांकां सांगिनासतना खबर आसतात. कोणूय तांचे कडेन मजती खातीर गेलो जाल्यार ताका रोखडीच मजत मेळटा. कौटुंबीक परंपरा सांबाळून समेस्त सत्तरी हो आपलो परिवार होच दिश्टीकोन मुखार दवरून मॅडम काम करता. खरें तर डाॅ. देविया राणे काम करता तें पळोवन एक प्रतिनिधी कितलो संवेदनशील आनी तत्पर आसप, तें दिसता. त्यो आस्वासन न्हय तर वचन दिता.
विधानसभा कामकाज, थळावें राजकारण, म्हामंडळाचे अध्यक्षपद सगळ्या मळांचेर तांणी बरी कामगिरी केल्या. हे खातीर तांकां परबीं दिवपाकूच जाय. आज आपल्या मतदारसंघ आनी लोकांचे प्रस्न, विकासाचे नदरेंतल्यान गांवगिऱ्या वाठारांत किते जाय ताची आमदार म्हणून तांकां जाणीव आसा. हांव स्वता खूब आमदार, मंत्र्यांक वळखता, तांची काम करपाची पद्दत जाणां. कांय लोकांक आमदार जावप म्हणल्यार व्हडलें कितें तरी केलें, लक्ष्य गाठलें अशे दिसता, पुण देविया राणे आमदार आसून पसून नम्रपणान वागतात. तांचे कडेन शिकपा सारकें खूब आसा. आपल्या मतदारसंघाचो पुराय अभ्यास कसो करप, विशय कशे सोडोवप. मागीर आर्थिक, समाजीक, धर्मिक वा हेर कसलेंय मळ जावं, थंय आयिल्ले प्रस्न तांणी योग्य पद्दतीन सोडयल्यात, काम बरे तरेन हाताळ्ळां. हाचे मुखार ती हें कार्य करतली, हाची म्हाका खात्री आसा.
सरकारी येवजण्यो खूब आसात. त्यो मतदारसंघांत चालीक लागता काय ना, हें ती पळयता. त्यो सामान्य लोकांक मेळटल्यो हाचे कडेन ताचें लक्ष आसता. एक नेतो कसो आसचो, ताचें मॅडम हें बरें उदाहरण.
फक्त आमदार म्हणूनच न्हय तर गोंय रान उदरगत म्हामंडळाचें अध्यक्षपद तांणी बरे तरेन सांबाळ्ळां. रानां विकास. हिंटरलंड टुरिजम, पर्यटन खाते आनी रानां खाते हांची मदत घेवन वन पर्यटन. ताचो वापर करून गरीबांची अर्थिक परिस्थिती कशी सुदारप, हें तांणी दाखोवन दिलां. मागीर नेत्रावळी, खोतिगांव वा सत्तरी सारक्या गांवगिऱ्या भागांत लोकांक रानां, पर्यटन हाचो लोकांक कसो फायदो जावचो ही दूरदृश्टी आशिल्ली ही फुडारी. आमचे ‘विकास पुरुष’ जांणी नव गोमंतकाची बु्न्याद घाली, त्या आदले मुख्यमंत्री आदरणीय प्रतापसिंह राणेसाहेब, हांची ती सून. तांची विकासाची नदर मॅडमीक आसा, हें पळोवन खूब बरें दिसता.
रानां उदरगत म्हामंडळाचें काम पळयल्यार आयज मॅडमीचें कर्तृत्व कळटा. आमचे फुडारी विश्वजीत राणे हांचेंय मार्गदर्शन तांकां मेळटा. पूण देविया राणे हांणी स्वताची स्वतंत्र वळख निर्माण केल्या. गरीब कल्याण, विकासनशील विचार, तरणाट्यां लागपी खेळां सुविधा, शिक्षण उपलब्ध करून दिवपांत तांणी फुडाकार घेतला. विधानसभेंत लोकांचे प्रस्न मांडपाची तांची कळाशी, अधिकाऱ्यांक घेवन काम करपाची पद्दत… अशें हें क्रियाशील फुडारपण आमकां पळोवपाक मेळटा.
राजकारण आनी समाजकारणांत त्यो आनीक उंचेल्या पांवड्याचेर पावतल्यो. ह्या सगल्या प्रवासांत आमी तांचे वावुरपी सदांच तांचे वांगडा आसतले. तांचें आनी विश्वजीत हांचे विचार, कार्य लोकां मेरेन पावोवपाचें काम चालूच आसतलें. डाॅ. देविया राणे हांकां तांचे फुडले वाटचाली खातीर परबीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
