लोकांक फायदो जाता जाल्यार चर्चीलान पक्ष बदलचो

भांगरभूंय | प्रतिनिधी

विजय सरदेसायः फातोड्डेंच्या वॉकींग ट्रॅकाची केली पळोवणी

भांगरभूंय । प्रतिनिधी

मडगांवः चर्चील आलेमांव खंयूय गेल्यार चलता, पूण ताचो फायदो मतदारसंघांतल्यो लोकांक जावपाची गरज आसा. आपूण भाजपा सरकारांत गेलों तेन्ना फक्त दोन वर्सां भितर फांतोड्डेंच्या लोकांचीं कामां मार्गाक लायलीं. बाणावलेच्या लोकांक फायदो जाता जाल्यार चर्चीलान पक्ष बदलचो. ताका राजकी नदरेन योग्य पावल म्हणूं येता, अशें मत आमदार विजय सरदेसाय हांणी उक्तायलें. फातोड्डेंच्या वॉकींग ट्रॅकाची पळोवणी केले उपरांत ते उलयताले.

ज्या सुविधांचो लोक चडांत चड वापर करतात, ताची देखभाल, दुरुस्ती करप गरजेचें आसा. हायमास्टाचो उजवाड सारको पडना. हजारांनी लोक हे सुविधेचो वापर करतात. गेडा एजन्सी कडल्यान सौर उर्जेचेर चलपी लायटी वॉकींग ट्रॅकाचेर घालपाची मागणी केल्या. ओपन जीमची वेवस्थाय हे सुवातेर केल्या. आतां पियेवपाच्या उदकाची वेवस्था आनी शौचालयाची गरज आसा. राज्य सरकारा कडल्यान ते खातीर निधी मेळना जाल्यार वी फॉर फातोड्डा वतीन ह्यो सुविधा दिवपाक आपूण तयार आसा, अशें सरदेसाय हांणी सांगलें.

आपणे मुख्यमंत्र्यांचेर टिका करता, तरी लेगीत केंद्र सरकाराच्या माध्यमांतल्यान वेस्टर्न बायपासाचेर फातोड्डेंच्या वाठारांत स्टील्ट पूल मंजूर क रून घेतल्यात. चर्चील आलेमांव हांणी मुख्यमंत्र्यांचें खूब कवतूक केलां, पूण कांयच जावंक ना. पूण वैयक्तीक फायद्या खातीर कोणूय कितें करता जाल्यार ताचेर आपूण उलोवचों ना. चर्चील हांणी जाता तितले बेगीन भाजपांत प्रवेश करचो आनी बाणावलेच्या लोकांची मागणी आशिल्लो स्टील्ट पूल पुराय करून घेवचो. चर्चील हांणी गोंयांत हे आदीं केल्लीं कामां आपूण न्हयकारिना. तांणी उदरगतीचीं कामां केल्यांत, पूण लोकांक गरजेचीं आनी तांची मागणी आशिल्लें काम पुराय करूंक ना. तांणी जांचेर विस्वास दवरलो ते पर्रीकार हांणी केल्ल्या कामांचीं उक्तावणां करतात, अशीय टिका सरदेसाय हांणी केली.

10 दिसां भितर स्विमींग पूल सुरू करचो

फातोड्डेंचो स्विमींग पूल फाटलीं चार वर्सां बंद आसा. ताचे दुरुस्ती खातीर 75 लाख रुपया खर्च केल्यात. स्विमींग पुलांत 40 लाख लिटर उदक भरचे खातीर सुमार सप्तकभर वेळ लागतलो. मडगांवचे आमदार दिगंबर कामत हे स्विमींग फेडरेशन ऑफ इंडियाचे अध्यक्ष आसात. स्विमींग पूल बंद आशिल्ल्यान खूबशा भुरग्यांक ताचो वापर करपाक मेळना. ते खातीर 10 दिसां भितर स्विमींग पूल सुरू करचो, ना जाल्यार जनआंदोलन करतले, अशी शिटकावणी आमदार विजय सरदेसाय हांणी दिल्या.

कार्यालयां साश्टींतल्यान वचप ही उदरगत न्हय

अन्न आनी वखदां प्रशासन, ईडीसी, पासपोर्ट अशीं कार्यालयां एके कडेन आसचीं हे खातीर तीं दक्षीण गोंयांत हाडिल्लीं. मात राज्य सरकाराक साश्ट आनी दक्षीण गोंय म्हत्वाचो दिसना. ते खातीर ईडीसी कार्यालयाचें स्थलांतर केलां. एकूय मंत्री साश्टींत ना. आतां जे पक्ष बदून गेल्यात, तांचें कितें जाता तें पळोवया. तांणी उदरगती खातीर पक्ष बदल्ला. ते कितें करतात तें दिसतलेंच. अर्थीक राजधानींत आशिल्लीं कार्यालयां बंद करप, ही उदरगत आसपाकूच शकना, अशी टिका विजय सरदेसाय हांणी केल्या.