भांगरभूंय | प्रतिनिधी
पेडणें: पंच वांगड्यांनी त्या प्रभागांतल्या लोकांच्यो समस्या सोडोवपा वांगडा जनकल्याण करपाचे नदरेंतल्यान वावुरचें आसता. जर थळावो पंच जागृत रावल्यारूच पंचायत वाठारांत नाका जाल्ले प्रकल्प उबे रावचे नात. बेकायदेशीर प्रकल्प उबे करपाची तयारी केल्या जाल्यार ताका पंच वांगड्यांनी पयलींच खर विरोध करपाक जाय. कसल्याच चेपणाक बळी पडपाक जायना. उपरांत ग्रामस्थां कडेन चर्चा करून हाचेर योग्य तो निर्णय घेवपाक मेळटा, अशें मत आदले सरपंच, सध्याचे पंच प्रशांत उर्फ बाळा नायक हांणी उक्तायलें.
हालींच मांद्रें पंचायत मंडळान आश्वें दोंगर-रान वाठारांत १८ विला तयार करपा खातीर बिगर गोंयकार वेवसायिकांक परवाने दिल्यात. हेच फाटभूंयेर माद्रेंच्या कांय जागृत गांवमोगी नागरिकांनी सरपंच राजेश मांजरेंकार हांची भेट घेवन तांकां लेखी निवेदन दिवन ज्या विलांक ना हरकत दाखलो दिला, ताची कार्यवाही करची न्हय, अशी मागणी केली. ताचेर प्रशांत नायक हांणी ही प्रतिक्रिया दिली.
खंयच्या प्रभागांय खंयचो प्रकल्प येता हाची पुराय म्हायती पंचायत वांगड्यांक आसपाकूच जाय. म्हायती नासल्यार पंचांचे बसकेंत ह्या प्रकल्पाक आपलो विरोध आसा अशी भुमिका घेवची. आनी उपरांत त्या पंच वांगड्यांनी ग्रामस्थां वांगडा बसका घेवन योग्य निर्णय घेवंक जाय, अशें प्रशांत हांणी सांगलें.
हांवें प्रकल्प आडायले
प्रशांत नायक हांणी सांगलें, आपल्या प्रभागांत दोंगोर आनी रानांनी लाखांनी चौरस मिटर जमीन बिगर गोंयकारांनी विकत घेतिल्ली. ते सुवातेर बंगले, इमारती, विला उबारपा खातीर हालचाली सुरू जाल्ल्यो. मात हांवें ह्या सुरवातेक विरोध केलो. ग्रामस्थांनीय म्हाका तेंको दिलो. हाका लागूनच म्हज्या प्रभागांत कसलेच तरेचे मेगा प्रकल्प, विला आयज मेरेन उब्यो रावूंक नात.
मागीर आमी कित्याक न्हय?
जूनस वाडो दिर्यादेग वाठारांतलो एक पंच वांगडी रॉबर्ट फर्नांडीस हांच्याय प्रभागांत विला उभ्यो रावपाच्यो आशिल्ल्यो. फर्नांडीस हांणी नागरिकांचो विरोध आसल्यार आपल्याक प्रभागांत अशे तरेचे प्रकल्प नाका. पंचायतीन परवाने दिवचे न्हय, अशी नेटान मागणी केली. तेन्नाय त्या प्रभागांत एकूय विला उब्यो रावूंक पावल्यो नात, हाची याद प्रशांत नायक हांणी करून दिली. तांकां जमता जाल्यार आमकां, तुमकां हें कित्याक जमचें ना, असो प्रस्न तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
