भांगरभूंय | प्रतिनिधी
भांगरभूंय । खबरां मेज
पणजीः जेनेरीक वखदां आनी ब्रँडेड कंपन्याच्या वखदां मदी तसलो कांय फरक ना. मात तांच्या मोलांत 50 तें 90 टक्केमेरेन व्हड फरक आसता. जेनेरिक वखदां साबार लोकांक परवडपी आसतात.ताकां ही वखदां उपलब्ध करून दिवपात केंद्र सरकारचो फुडाकार आसा. लोकांक परवडपी दरांत वैजकी सेवा उपलब्ध करून दिवपाच्या हेतान व्हो उपक्रम चालीक लायतात. जेनेरीक वकदां लोकांक उपलब्द करून दिवप ही सरकाराची लागणूक अशें मुख्यमंत्री डॉ.प्रमोद सावंत हांणी 5व्या जनवखदी दीस कार्यावळींत उलयतना सांगलें.
भारत सरकाराच्या रसायनां आनी सारें मंत्रालयाच्या पालवान भलायकी सेवा संचालनालयान सोमाराक आयोजीत केल्ल्या प्रधानमंत्री जनवखदां येवजण कार्यावळींत मुख्यमंत्री उलयताले. जेनेरीक वखदां सवाय आनी साबार लोकांक परवडपी आशिल्ल्यान लोकांमदी ह्या वखदां विशीं जाग्रुताय करपाची गरज आसा.लोकांक परवडपी अश्यो वैजकी सुविधा उपलब्द करून दिवपाचो सरकारचो यत्न आसा आनी ते खातीर दरेका फार्मासीत जेनेरीक वखदांचो खासा कावंटर आसपाक जाय. तशेंच दोतोरांनीय अशी वखदां बरोवन दिवपाक जाय, अशें मुख्यमंत्र्यांनी सांगलें.
सरकारी हॉस्पिटलां आनी भलायकी केंद्रांनी जेनेरीक वखदां उपलब्द करून दिवपाक सरकाराचे प्रयत्न आसतले अशेंय तांणी सांगलें. भलायकी मंत्री विश्वजीत राणे हाणे सगळ्यां खातीर भलायकी हें प्रधानमंत्र्यांचें व्हिजन आनी मिशन येसस्वी करपाक राज्य सरकार बांदल्लें आसा. राज्यांतल्या दरेका नागरिकाक परवडपी दरांत वैजकी सेवा दिवपाचे यत्न चल्ल्यात अशें सांगलें. प्रधानमंत्री जनवखदी येवजणे खाला सवाय दरांत जेनेरीक वखदां उपलब्द करून दितले अशें तांणे सांगलें. अन्न आनी वखदां प्रशासन खात्याची संचालक ज्योती सरदेसाय हिणे जेनेरीक वखदांची मोल,गुणवत्ता आनी हेर म्हत्वाची म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
