भांगरभूंय | प्रतिनिधी
मडगांवः लोकांक जी गजाल नाका, ती भाजपा तांचेर केन्नाच मुद्दाम लादची ना. कारण राज्य सरकार उदरगत करता ती फक्त लोकां खातीर करता. लोकांकच एकादो प्रकल्प नाका आसल्यार ताच्या कामा विशीं प्रस्न चिन्न उप्रासतात अशें मत भाजपा प्रदेशाध्यक्ष दामू नायक हांणी उक्तायलें.
राज्यांतल्या वेगवेगळ्या सुवातींनी जावपी आंदोलना विशीं उलयतना उदरगतीचीं कामां लोकां खातीर करतात, ती लोकांक नाका जाल्यार लोकांचेर ती केन्नाच लादची ना अशें नायक हांणी स्पश्ट केलें. मडगांवां एके कार्यावळींक गेल्ले ते वेळार ते उलयतालें.
कांय जाणांक कितें तरी बरें करचें अशें दिसता, पूण दुसरे वटेन कांय जाणांक तातूंतल्यान आडमेळीं आनी त्रास जातलो असो दिसता जाल्यार अशो गजाली जावंक फावना अशें तांणी सांगलें. मीराबागच्या बांदाच्या आंदोलना संबंदी मुख्यमंत्र्याक सगल्यो गजाली खबर आसात. ताचेर योग्य निर्णय घेवपाक तांकां सांगलां. ह्या प्रकरणांत आपूणय थोडें लक्ष दितलो अशें भाजपाचे प्रदेशाध्यक्ष दामू नायक हांणी सांगलें.
भाजपाचें लक्ष संघटनेचेर
आरजी आनी आम आदमी पक्ष हांचे मदल्या युती विशीं विचारल्यार तांणी सांगलें,तांच्या पक्षाच्यो राडकीय घडामोडी फकत तांकांच खबर आसतल्यो. भारतीय जनता पक्ष विरोधी पक्षांत कितें घडटा हाचो हुस्को करना पूण पक्ष घटमूट करपा खातीर संघटनेचेर लक्ष केंद्रीत करता अशें दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
