भांगरभूंय | प्रतिनिधी
पणजी: खूबशीं वर्सां काम करून लेगीत नोकरेंत कायम जायत नाशिल्ल्यान तशेंच लोकसेवा आयोगाचे अटीक लागून कंत्राटी पद्दतीचेर काम करपी शारिरीक शिक्षकां मदीं निरशेवणी पातळ्ळ्या. मुख्यमंत्री डॉ. प्रमोद सावंत आनी खेळां मंत्री गोविंद गावडे हांणी आमची दखल घेवची अशी मागणी तांचे कडल्यान जायत आसा.
राज्यांतल्या सरकारी शाळांनी 580 शिक्षक कंत्राटी पद्दतीचेर आशिल्ल्याची खबर ‘भांगरभूंय’न शेनवारा उजवाडायिल्ली. हे खबरेची दखल घेवन खूबशीं वर्सां खेळां खात्यांत शारिरीक शिक्षक म्हूण कंत्राटी पद्दतीचेर काम करपी शिक्षकांनी आपली व्यथा ‘भांगरभूंय’ कडेन मांडली. फाटल्या बारा ते तेरा वर्सां सावन आमी खेळां खात्यांत शारिरीक शिक्षक म्हूण कंत्राटी पद्दतीचेर काम करतात. आमकां सेवेंत कायम करचे, हे मागणे खातीर आमी आतां मेरेन खूबशे फावटी धारणांय धरलीं. त्या वेळार मुख्यमंत्री डॉ. प्रमोद सावंत हांणीय आमची भेट घेतली.
‘उमादेवी’ प्रकरणांत सर्वोच्च न्यायालयान दिल्ल्या आदेशाची दखल दिवन आमकां कायम करूंक मेळना अशें सांगून तांणी आमकां पगारवाडूय दिली. पूण 20 डिसेंबर 2024 दिसा ‘उमादेवी’ प्रकरणांत सर्वोच्च न्यायालयान दिल्ल्या निवाड्यांत धा वर्सां कंत्राटी पद्दतीचेर काम करप्यांक सेवेंत कायम करूं येता अशें न्यायालयान म्हणलां. हे फाटभुंयेर आमकां सेवेंत कायम करचे अशी मागणी शारिरीक शिक्षक संघटणेच्या कंत्राटी पद्दतीचेर काम करपी एका शिक्षकान केली.
‘जीपीएससी’च्या अटींक लागून अन्याय
गोंय लोकसेवा आयोगान (जीपीएससी) हालींच जारी केल्ले जायरातींत शारिरीक शिक्षकांचे भरती खातीर 45 वर्सां पिरायेची अट घाल्या. संबंदितांनी उण्यांत उणें दोन राष्ट्रीय खेळां सर्तींनी वांटो घेतिल्लो आसचो अशें म्हणलां. ह्या नेमांत कंत्राटी पद्दतीचेर काम करपी कांय शिक्षक बसनात. पूण ह्या निर्णयाक लागून तांचेर अन्याय जातलो अशेंय एका शिक्षकान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
