भांगरभूंय | प्रतिनिधी
पणजीः आमदार सोडून गेले म्हूण काँग्रेस पक्ष काबार जावचो ना. लोकांक बरें- वायट कळटा. येता ते वेंचणुकेंत पक्षांतर करपी आमदारांक लोकूच घरा धाडटले, अशें गोंय काँग्रेस प्रभारी माणिकराव ठाकरे हांणी उक्तायलें. लोकसभा वेंचणुकेंत गोंयांत दोनूय सुवातांचेर काँग्रेस जिखतलो, असोय दावो तांणी केलो.
बुधवारा पणजे घेतिल्ले पत्रकार परिशदेंत ठाकरे उलयताले. ह्या वेळार तांचे वांगडा प्रदेशाध्यक्ष अमीत पाटकार, विरोधी पक्ष फुडारी युरी आलेमांव, आमदार एल्टन डिकॉस्टा आनी हेर पदाधिकारी हाजीर आशिल्ले.
ठाकरे हांणी सांगलें, हे आदींय पक्षांतर केल्ल्या लोकप्रतिनिधींक लोकांनी घरा धाडल्यात. आदींचे वेंचणुकेंत तेलंगणांत काँग्रेसीचे 24तले 17 आमदार पक्ष सोडून गेल्ले. ते उपरांत लेगीत 18 तले 13 जाण पक्ष सोडून गेले. हे खेपे तातूंतलो एकूय उमेदवार वेंचून येवंक ना. सुवार्था खातीर गेल्ल्यांक मतदारांनी तांची सुवात दाखयली. गोंयांत लेगीत अशेंच जातलें, हाची आपल्याक खात्री आसा.
फाटले दोन दीस आमी दोनूय मतदारसंघांत बसका घेतल्यात. काँग्रेस पक्ष एकवटान भाजपाक हारोवपाक तयार आसा. येता ती लोकसभा तशेंच 2027 तली विधानसभा वेंचणूक काँग्रेस जिखतलो, हाचो आपल्याक विस्वास आसा. पक्षांत एकवट ना हो दावो चुकीचो आसा. पक्षांतल्या फुडाऱ्यांनी पक्ष वाडी खातीर कांय शिफारशी केल्यात. ताचेर आमी विचार करून फुडली रणनिती थारायतले, अशें ठाकरे हांणी सांगलें. लोकसभा वेंचणुके खातीर पक्षान उमेदवारी प्रक्रिया सुरू केल्या. दोनूय सुवातां खातीर इत्सुकांनी अर्ज सादर केल्यात. हे अर्ज राज्य समिती वरवीं छाननी समिती कडेन आनी अखेर काँग्रेस केंद्रीय समिती कडेन वतले. ते उपरांत ही समिती अंतीन वळेरी जारी करतली, अशें ठाकरे हांणी सांगलें.
नार्वेकारांच्या निर्णयांत न्याय ना
पक्षांतर बंदी संबंदांत महाराष्ट्राचे विधानसभा अध्यक्ष राहूल नार्वेकार हांणी घेतिल्लो निर्णय हो राजकी निर्णय. त्या निर्णयांत न्याय आसचो ना, हें आदींच खबर आशिल्लें. हे संबंदांत सर्वोच्च न्यायालयांत वचपाचो निर्णय उद्धव ठाकरे हांचो पक्ष घेतलो, अशें माणिकराव ठाकरे हांणी सांगलें.
‘आप’च्या दाव्यां विशीं खबर ना
हे आदीं इंडिया आघाडींतलो एक घटक पक्ष आशिल्ल्या आपान लोकसभेच्या दक्षीण गोंयचे सुवातेर दावो केला. मात माणिकराव ठाकरे हांणी हे विशीं आपल्याक कांयच खबर नाशिल्ल्याचें स्पश्ट केलें. कांय थळावे पक्ष काँग्रेसीचीं मतां फोडून भाजपाक मजत करतात, असोय आरोप तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
