भांगरभूंय | प्रतिनिधी
संसदेची सुरक्षा वेवस्था दुबळी आशिल्ल्याची टिका
नवी दिल्ली, खबरां संस्था : संसदेचेर जाल्ल्या आतंकवादी हल्ल्याच्या २२ व्या वर्सुकी दिसा दोन तरणाट्यांनी अचकीत प्रेक्षक गॅलरींतल्यान सकयल उडी मारिल्ल्यान सभाघरांत खवदळ जालो. तांणी घोशणा दित कांय नळकांड्यो फोडल्यो. तातूंतल्यान हळडुवो धुंवर येवपाक लागला. ताका लागून कांय खासदार सुरक्षीत जाग्याचेर गेले. हे तरणाटे (एकल्याचें नांव सागर) बाकड्यां वयल्यान उडयो मारीत सभापतीचे दिशेन वचपाक लागले. तांकां काँग्रेसीचे खासदार गुरजीतसिंग औजला हांणी धरले. मागीर हेर खासदारांनी तरणाट्यांक बरेच बडोवन सुरक्षा रक्षकांच्या ताब्यांत दिले.
सदे भायरुय नीलम (४२, हिस्सार- हरियाणा) आनी अनमोल शिंदे (२४, लातूर- महाराष्ट्र) हांकां भारतमाता की जय, तानाशाही नही चलेगी.. अश्यो घोशणा दित नळकाडयां वरवीं गॅसाची फवारणी केल्ल्यान धरल्यात. हीं चवगूय जाणां एकठांय आशिल्लीं कांय वेगळीं ताचो सोद पुलीस घेतात. हे घडणुके उपरांत सभापती राजेंद्र अग्रवाल हांणी लोकसभेचें कामकाज दोन वरां स्थगीत केलें.
मजगतीं, ह्या घडणुकेक लागून लोकसभेचे सुरक्षा वेवस्थेचेर प्रस्नचिन्न उबें जालां. भोवतेक विरोधी खासदारांनी भाजपा सरकाराचेर खर टिका केल्या. कांय लोकांच्या म्हणण्यां प्रमाण, आपलें म्हणणें आयकून घेना म्हूण तिडकून ह्या तरणाट्यांनी तशें केलें. मात, भितर गेल्ले दोगूय तरणाटे एका खासदारा कडल्यान पास घेवन आयिल्ले, अशें कळटा.
मजगतीं, हो बोवाळ पळोवन सगळे खासदार हॉलांतल्यान भायर सरले. ह्या वेळार शिवसेनेच्या ठाकरे गटांतले खासदार अरविंद सावंत हांणीय भायर सरून प्रसार माध्यमां कडेन संवाद सादलो. हॉलांतल्या घडणुकेची म्हायती दितना सावंत हांणी सांगलें, लोकसभेचें काम चालू आसतना अचकीत प्रेक्षक गॅलरींतल्यान दोगा जाणांनी हॉलांत सकयल आयले. एका खांब्याच्या आदारान तो प्रेक्षक गॅलरींतल्यान सकयल देंवलो. दोगांयनी एका फाटल्यान एक उडी मारली. मागीर दोगांय एमपी बेंचेर उडी मारून धांवताले. मागीर तातूंतल्या एका मनशान आपलो बूट काडलो, बूट काडटना कांय खासदारांनी ताका घेराव घातलो. तशेंच दुसर्याय मनशाक धरलो. उपरांत सभाघरांत हळदुव्या रंगाचो स्प्रे पातळ्ळो. तो धुंवर नाका, दोळ्यांत वचून त्रास जावपाक लागलो.
लोकसभेंत धरल्यात त्या तरणाट्यांनी जें कितें केलें तातूंत व्हडलेशें लुकसाण जावंक ना, मात कल्पना करात, तें खूब गंभीर जावं शकताले. आयच्या दिसा २००१ त संसदेचेर हल्लो जाल्लो. आतां नेमको त्याच दिसा सुरक्षेच्यो तिस्त्यो वादऱ्यो जाल्ल्यो आमी पळयतात. गृहमंत्र्यान सुरक्षेंत उणाव आसा, ते विशीं देशाक सांगपाक जाय, अशी प्रतिक्रिया काँग्रेसीचे खासदार शशी थरुर हांणी सांगलें.
भोवतेक सगल्या विरोधकांनी हे घडणुकेचो निशेध केला. लोकसभा सुरक्षीत ना, हें हातूंतल्यान दिसून येता, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
