भांगरभूंय | प्रतिनिधी
भांगरभूंय । प्रतिनिधी
पेडणेंः गोंयचे प्रश्न मांडपी, अभ्यासू वृत्तीच्या तशेंच राजकारणाची जाण आशिल्लो खासदार लोकसभें जाय जाल्यार रमाकांत खलप हांचे बगर दुसरो पर्याय ना. उत्तर गोंयांतल्या खासदार म्हणून गेल्ल्या मौनी बाबान कितें केलें हें गोंयकारांक खबर आसा. तेन्ना विचार करून मतदान करून उत्तर गोंयांत खलप हांका जैतिवंत करपाचें आवाहन हळदोणचो आमदार आनी उत्तर गोंय लोकसभा वेंचणुकेचे समन्वयक अॅड कार्लुस फरेरा हांणी पेडण्यात भगवती देवीचें दर्शन घेवन रमाकांत खलप हांच्या प्रचाराक सुरवात करतना सांगलें.
पेडणे गट काँग्रेस अध्यक्ष कृष्णा नायक, सरचिटणीस अॅड जितेंद्र गांवकार सावंत, जगन्नाथ सावळ देसाय आम आदमी पक्षाचे पुंडलीक धारगळकार आनी हेर समर्थकां वांगडा खलप हांणी पेडण्यातल्या प्रचाराचो नाल्ल फोडलो. रमाकांत खलप हांणी केंद्रांत कायदो मंत्री आसतना वेगवेगळे कायदे केले. एक अभ्यासू खासदार म्हणून नामना मेळयलीं. पुराय उत्तर गोंयांत काँग्रेस उमेदवार खलप हांच्या नांवाची चर्चा आसा असो दावो अॅड फरेरा हांणी केलो. भाजपाच्या खासदारान गोंयच्या दरेका प्रश्नाचेर तोंड धापून ओगी रावप पसंत केलें. असले मौनी बाबा कांय कामाचे ना हें आतां उत्तर गोंयांतल्या मतदारांक कळ्ळां अशें तांणी सांगलें. आमी सध्या वनवासांत आसात. व्हो वनवास सोपोवपा खातीर इंडिया आघाडेन रमाकांत खलप हांच्या रुपांत आमकां एक बरो उमेदवार दिला. सगळ्या पेंडणेकारांनी तांच्या फाटल्यान रावन तांकां जैतिवंत करपाचो उलो पुंडलीक धारगळकार हांणे मारलो.
पक्षाची उमेदवारी जाहीर जातगीर आपल्याक उत्तर गोंयांत सगळे कडेन बरो प्रतिसाद मेळटा. मांद्र्यांतल्या लोकांनी स फावट म्हाका आमदार म्हणून वेंचून दिल्लें. उत्तर गोंयांतल्या लोकांनी हाचे पयलीं एक फावट खासदार म्हणून काम करपाची संद दिल्ली. राज्याच्या हित राखणे खातीर लोक हे खेपे आपल्याक परत वेंचून दितले असो विस्वास खलप हांणी उक्तायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
