भांगरभूंय | प्रतिनिधी
श्रीपाद नायक पयल्या नंबरार, केलो 64 लाख 61 हजार 916 रुपया खर्च
पल्लवी धेंपो दुसऱ्या नंबरार, केलो 57 लाख 52 हजार 239 रुपया खर्च
भांगरभूंय । प्रतिनिधी
पणजीः हालींच जाल्ले लोकसभा वेंचणुकेंत केंद्रीय मंत्री श्रीपाद नायक हांणी गोंयच्या हेर उमेदवारांचे तुळेंत सगळ्यांत चड खर्च केल्लो. तांणी वेंचणूक प्रचार, सभा आनी प्रचारा संबंदांतले हेर गजालीं खातीर 64 लाख 61 हजार 916 रुपया खर्च केल्ले. देशांतली सगळ्यांत गिरेस्त महिला उमेदवार आशिल्ली पल्लवी धेंपो हांणी 57 लाख 52 हजार 239 रुपया खर्च केलो. हे वळेरेंत ती दुसऱ्या नंबरार आसा.
मुख्यमंत्री डॉ. प्रमोद सावंत हांणी विधानसभेंत दिल्ले लेखी जापेंतल्यान ही म्हायती मेळ्ळ्या. हे विशींचो आमदार एल्टन डिकोस्टा हांणी अतारांकीत प्रस्न उपस्थीत केल्लो.
मुख्यमंत्र्यान दिल्ले जापेंतल्यान मेळिल्ले म्हायती प्रमाण दक्षीण गोंयचे खासदार विरियातो फर्नांडीस हांणी वेंचणुकेंत 54 लाख 52 हजार 834 रुपया खर्च केल्ले. ते उपरांत उत्तर गोंयचे काँग्रेसीचे उमेदवार अॅड. रमाकांत खलप हांणी 40 लाख 50 हजार 916 रुपया खर्च केल्ले.
अंदूंचे लोकसभा वेंचणुकेंत प्रचाराचेर खर्च करपाक अपक्ष उमेदवार फाटीं रावूंक नात. उत्तर गोंयांतले अपक्ष उमेदवार शकील जमाल शेख हांणी वेंचणुकेंत 36 लाख 33 हजार 988 रुपया खर्च केले. ते उपरांत उत्तर गोंयांतले आरजी पक्षाचे उमेदवार मनोज परब हांणी वेंचणूक प्रचारांत 19 लाख 82 हजार 685 रुपया खर्च केले. जाल्यार आरजीचे दक्षीण गोंय उमेदवार रुबर्ट परेरा हांणी प्रचारा खातीर 10 लाख 39 हजार 600 रुपया खर्च केल्ले.
वेंचणूक आयोगाच्या नेमां प्रमाण उमेदवाराक वेंचणूक खर्चा खातीर निधी उबारपाची परवानगी आसता. ते प्रमाण खासदार विरियातो फर्नांडीस हांणी वेंचणूक काळांत 49 लाख 83 हजार रुपयांचो निधी उबारिल्लो. तातूंतले 20 लाख 38 हजार रुपया तांणी स्वताच्या बोल्सांतल्यान मोडिल्ले. तशेंच तांकां गोंय काँग्रेस प्रदेश समिती कडल्यान 25 लाख 75 हजार रुपया मेळिल्ले. जाल्यार एके व्यक्ती कडल्यान वा कंपनीं कडल्यान 3 लाख 70 हजार रुपया मेळिल्ले.
उमेदवारांचो खर्च
मिलन वायंगणकार उत्तर गोंय 1,02,430
अॅड विशाल नायक उत्तर गोंय 64,300
सखाराम नायक उत्तर गोंय 55,786
हरिश्चंद्र नायक दक्षीण गोंय 55,455
अलेक्सी फर्नांडीस दक्षीण गोंय 51,950
दीप कुमार मापारी दक्षीण गोंय 32,100
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
