भांगरभूंय | प्रतिनिधी
म्हजें मत
लोकसंख्येचेर नियंत्रण दवरप ही नागरिकांचीय जबाबदारी जावन आसा.
वाडटी लोकसंख्या हो हुस्क्याचो विशय जाला. कुटुंब कल्याण, कुटुंब नियोजन ह्यो येवजण्यो खंयतरी चुकल्यात म्हूण आमची लोकसंख्या वाडत आसा. सरकार सदांच लोकसंख्या वाडीचेर भाशणां दिता. हम दो हमारे दो अशेंय म्हणटा. मात कुटुंबांचो आकार वाडत आसा. ते वटेन म्हारगाय मळबाक तेंकल्या. जोडपी एकटोच, खाणारीं धा तोंडां. बाजारांत दरेका वस्तुचें मोल 1990 चे तुळेन पांच पटीन वाडलां. ताका कांयच परवडना.
आतां सरकार हम दो हमारा एक अशी घोशणा करता. लोकसंख्या वाडिल्ल्यान ताचे वायट परिणाम आमचे जिणेचेर जातात. लोकसंख्येची वाड म्हणजे सामकी घातक गजाल. ही वाड फक्त आंकड्यां पुरतीच मर्यादीत ना, तिचे परिणाम समाजाच्या दरेका आंगार उदेतात. ही वाड म्हणल्यार देशाच्या अर्थीक, समाजीक, पर्यावरणीय, उद्देगीक मळाचेर एक समस्येचो दोंगर कशी. वाडटी लोकसंख्या ही विकासाचे नदरेन व्हडलें आडमेळें. ती उदरगतीक बादा हाडटा. ताण, तणाव, बेरोजगारी, पर्यावरणाची संतुळा इबाडटा. रोजगार, अन्न उदकाची टंचाय, राना- वनाची कत्तल, शिक्षण आनी प्रदुशण ह्या समस्यां वांगडाच मनशाचे भलायकेक वायट थारुं येता.
दिसान दीस लोकसंख्या वाडत आसा. सरकाराचो हम दो हमारा एक हो नारो कोणूच आयकुंक तयार ना. घरांत भुरगीं खूब आसप बरें अशें जाणकार म्हणटाले. घराक सोबा येता म्हणटाले. पूण हे तांच्या तेंपार चलताले, ते स्वता काम करताले. सगलेंच सवाय भितर मेळटालें. आसा तातूंत समाधान मानून ते कशीय पोटाची खळगी भरताले. नुस्तें गरोवन हाडटाले, भात, भाजी, फळां पिकयताले, खाणां, पापड, लोणचीं घरांतूच करताले. सायकल वापरताले. मोबायल फोन, एसी नासले. मात आतां हें बदल्लां. सगलेच नोकरेक वतात. बेकार आसात ते कश्ट करीनात. आतां कितेंच विकतें हाडप परवडना. म्हारगायेन जीव सामको विटला. तिका तोंड दिवप दर एकल्याच्या जिवार आयला. एक म्हासंकश्ट मुखार उबें रावलां. चड भुरगीं आसल्यार जोडपी हात वाडटले, अशें थोड्यांक दिसता.
दुसरे वटेन कांय जाण म्हणटात, लोकसंख्ये कडेन समस्या म्हूण पळोवचे परस एक संद म्हूण पळोवप खरेंच बरें. बाजारपेठेक खंय चड लोकसंख्या बरी.
लोकसंख्येचेर नियंत्रण दवरप ही नागरिकांचीय जबाबदारी जावन आसा. बाजारांत हजार रुपयांक वीस अळम्यांचे कळे घेतले काय ते म्हारग जातलेच. कोणेच घेवंक ना जाल्यार सवाय जातले. लोकांनी कुटुंब ल्हानूय दवरूंक जाय. गोंयांत हें आसा, पूण हेर कडलें कितें? सुशिक्षीत मनशान ल्हान कुटुंबाचे फायदे दुसऱ्यांक सांगपाक जाय. ल्हान कुटुंब हें सुखी कुटुंब, ही आयच्या काळाची गरज हें कोणे विसरचें न्हय.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
