लोकसंख्येचेर नियंत्रण जायच !

भांगरभूंय | प्रतिनिधी

बायलांचें शिक्षण आनी रोजगार वाडल्यार लोकसंख्येचेर नियंत्रण येतलें.

अायज लोकसंख्या दीस. भारताची लोकसंख्या सध्या 1 अब्ज 46 कोटी आसा. तर चीन आमचे फाटोफाट 1 अब्ज 41 कोटींचेर. जाणकारांच्या मतान, फुडल्या 40 वर्सांच्या काळांत आमी 1.76 अब्जांचेर पावतले आनी उपरांत आमची लोकसंख्या देंवपाक लागतली खंय. मात, तो मेरेन एकान एक कुटुंबां गिरेस्त जातलीं कांय नात, ताचो अदमास कोणे उक्तावंक ना. चड लोकसंख्या आसप धोक्याचें, लुकसाणाचें अशें पयलीं म्हणटाले, मात आतां चड लोकसंख्या खूब फायद्याची असो दावो जायते अर्थतज्ञ करतात. हो फायदो अर्थांत उद्देजकांक!! भारतांतली 65 टक्के संपत्ती 10 टक्के लोकांच्या हातांत आसा. तर मदल्या 40 टक्के लोकांच्या हातांत 28.6 टक्के. तळाच्या 50 टक्के लोकांच्या हातांत फक्त 6.4 टक्के संपत्ती आसा. म्हणटकच उदरगत सारकी जायना, असो ताचो स्पश्ट अर्थ. मतां खातीर फक्त रेवड्यो वांटचे परस सगल्यांचो विकास कसो जातलो, ताचेर चड लक्ष दिवंक जाय. कोरोना काळांत बरेच मध्यमवर्गीय गरीब जाल्यात, हें मतींत घेवन सरकाराक पावलां उखलचीं पडटलीं.
आमची लोकसंख्या नेटान वाडटा. ताका लागून लोकांक पोटा खातीर स्थलांतर करचें पडटा. गरिबी आसा तशीच आसा. ती इतली की सवलती, अनुदान बंद केल्यार बऱ्याच लोकांचेर उपाशी रावपाचो वेळ येवं येता. समाजीक, धर्मीक कारणांक लागून गरजे परस चड भुरगीं जल्माक घालपाचें पिशेंपण वाडलां. शिक्षण, कुटुंब नियोजना विशीं जागृताय करपाक आमी उणे पडल्यात. ‘भुरगीं हीं देवाची देणगी’ अशें मानपी अजून लाखांनी लोक आसात. चलोच जाय अशेंय कुटुंबांक दिसता. बायलांचें शिक्षण आनी रोजगार वाडल्यार लोकसंख्येचेर नियंत्रण येतलें. कुटुंब नियोजन सुविधाय सुदारपाक जाय.
कुटुंबांत चड वांगडी आसल्यार काम करपी हात वाडटात. जाण्ट्यांची, भुरग्यांची जतनाय घेवप सोंपें जाता. अर्थीक आदारूय जाता. मात आतां एकोडीं कुटुंबां वाडिल्ल्यान हें उणें जालां. कुटुंब आकारान वाडलें जाल्यार शिक्षण, भलायकी, रावपाक जागो, खर्च वाडटा. चड लोकसंख्येक लागून उद्देगांक मनीसबळ मेळटा, बाजारपेठ तरतरता. उत्पादन, वेपार वाडटा, विदेशी गुंतवणूक वाडटा, उत्पादन तांक वाडटा, अशें थोड्यांक दिसता. मात, म्हारगायेक लागून लोकांची विकत घेवपाची शक्त उणी जाल्या. विदेशी कंपनीं आपलो कसलोय म्हाल हांगा उण्या मोलान डंप करतात. मागीर तो मध्यमवर्गीय विकत घेतात. बरो म्हालूय सगले विकत घेतात. पूण हो सगलो पयसो भारतांत उरता काय भायर वता, तें कोण तपासता? वाडत वचपी लोकसंख्येक लागून साधनसुविधांचेर पेज येता. खास करून उदक, वीज, कोयर, येरादारी बी. प्रदुशण मळबाक तेंकता. निवृत्त लोकांचो आंकडो वाडिल्ल्यान पेन्शनाच्या वज्यान सरकार चेंपता. ह्या लोकांचो फायदो जावचो म्हूण सगल्यांचीच निवृत्ती पिराय खरें म्हणल्यार 60 वर्सां करपाक जाय. मात बेरोजगारांचो आंकडो चड आशिल्ल्यान तेंय करपाक मेळना. विकसीत देशांचे तुळेन भारतांत तरणाटे चड. उत्पादन क्षमताय चड. मात सुविधा, तंत्रज्ञानाचे बाबतींत आमी अजून फाटीं आसात. भायल्यान मायदेशांत येवपी भारतीयांचो आंकडो वाडपाक लागला, तरी भायर वचपी भारतीय ताचे परस दुपेट, तिपेट आसा!!
गोंयांत लोकसंख्या वाड तशी नियंत्रणांत आसा. कुटुंबां ल्हान जायत आसात. मात भायल्यान येवपी लोक थळाव्यां परस संख्येन वाडपाक लागल्यात. फुडल्या 20- 25 वर्सांनी नीज गोंयकार उणे जातलें, अशें चित्र आतांच स्पश्ट दिसता. संयुक्त राष्ट्र लोकसंख्या निधीच्या अहवाला प्रमाण, भारताचो प्रजनन दर देंवता. मात, लोकसंख्या संवसारांत सगल्यांत चड आसा.
लोकसंख्येचे फायदे आसूं वा नासूं कुटुंबां ल्हान दवरल्यार वैयक्तीक फायदो जाताच. लोकसंख्येच्या आंकड्या परस दर्जो म्हत्वाचो, हें आयच्या दिसा मनाचेर घट कोंरांतून दवरुंया.