लोकसंख्या हाताभायर गेल्या

भांगरभूंय | प्रतिनिधी

अन्नाचो इबाड जावपाक दिवंक जायना, कारण आमचे व्हड लोकसंख्येचें पोट आमकां भरपाक जाय, नाजाल्यार समाजांत यादवी मात्तली

अामचो देश लोकसंख्येचे बाबतींत संवसारांत पयल्या क्रमांकाचेर आसलो तरी लोकमेजणी करपी कांय संस्थांच्या मतान अजून चीन आमचे परस थोडो मुखार आसा. मात फुडल्या कांय वर्सांनी भारत ताका फाटी उडयतलोच. लोकसंख्येचे फायदे आसात, तशें लुकसाणूय आसा. आमी लुकसाणाचो चड विचार करूंक जाय. कारण आमकां जातात, ताचे परस कितलेशेच पटीन चड फायदे हेर देशांक जातात. खास करून वेपारी देशांक! आयज संवसारीक लोकसंख्या दीस. संवसारभर तो पाळटले आनी सांज जातकच सगले सगळें विसरून वतले. जे विचार व्यक्त जातले, तातूंतले थोडे तरी कृतींत येवप गरजेचें.
भारताची लोकसंख्या 1960 त 45 कोटी आशिल्ली. फाटल्या 63 वर्सांनी त 216.5 टक्के वाडून 1 अब्ज 42 कोटींचेर पावल्या. हालींच्या वर्सांनी लोकसंख्येची वाड संथपणान जाता. तरीय ती देशा खातीर घातक. एकमेकां कडेन बोटां दाखय नासतना सगल्या धर्माच्या लोकांनी हाचेर विचार करपाची गरज आसा. आमची लोकसंख्या नेमकी कितली आसा आनी ते विशींची हेर म्हायती कळपाक मार्ग ना. कारण निमणी लोकमेजणी 2011 त जाल्ली. ह्या 12 वर्सांत खूब बदल जाल्यात. पूण जनगणनेचो अदमास उक्तावपी संस्थांच्या मतान भारतांत 2050 मेरेन लोकसंख्येचो स्फोट जातलो. सध्या 32 टक्के भारतीय शारांनी रावतात, तर 68 टक्के गांवांनी. धर्माचें वक्ल लावन पळयत जाल्यार हिंदू 79 टक्के, इस्लाम 14 टक्के, तर क्रिस्तांव 2 आनी शीख 1.7 टक्के आसात. हिंदू भोवसंख्य आसले तरी आमच्या देशांत सगल्या धर्म- पंथांचो समाज एकवटान रावता. अदींमदीं कांय घडणुको घडटात. ना अशें ना. पूण राजकी दळडिरे करतात तो दुस्वास सोडल्यार हांगां समाजां मदीं भावचार दिसता.
देशांत मरणाचो दर 0.5 टक्के इतलो आसा. अत्याधुनीक उपचार पद्दती, बऱ्या वखदांक लागून मरणां उणीं जाल्यांत. ताका लागून लोकसंख्या वाडल्या, असो कांय जाणांचो दावो. पूण, ते लोकसंख्येक सैमीक साधनांचो वापर खूबच वाडला. झाडां कापप वाडलां, ताका लागून रानां जीव आनी मनशांचे संबंद इबाडल्यात. प्रदुशण, अन्नांत भेसळ वाडल्या. नितळ हवा ना, उदक ना, मेळटा थंय लोक घाण करून दवरतात, म्हारगाय वाडल्या, बेकारे विशीं तर विचारूं नाकात. लोकसंख्या वाडिल्ल्यान संवसारीक तापमान वाडलां. कोयराचो राकेस वाडत आसा. आतां ई- कोयराची नवी समस्या तयार जाल्या. फुडल्या कांय वर्सांनी ती आमच्या माथ्यार हात दवरून आमकां भस्म करपाची भिरांत न्हयकारपाक येना. अर्थीक मळाचेर आमी दुबळे जायत आसात.
ऑक्सफॅम हे संस्थेच्या मतान, आयज पसून दर मिनटाक उणेच 10 लोक भुकेन मरतात. भारतांत दर घरांत वर्साक 50 किला वयर अन्न भायर पडटा. तर देशांत हो आंकडो सुमार 7 कोटी टन इतलो आसा. खुद्द सरकाराच्या अहवाला प्रमाण, फाटल्या पांच वर्सांत 38 हजार मे. टना परस चड अन्नधान्य फुकट गेलां. सुवाळ्यांनी जेवपी लोकांनी हाचेर विचार करपाक जाय. संयुक्त राष्ट्रांच्या मतान 2021 त संवसारांत उपाशी उरपी लोकांचो आंकडो 82 कोटी इतलो आशिल्लो. भारतांत तरी अन्नाचो इबाड जावचो न्हय, कारण आमचे व्हड लोकसंख्येचें पोट आमकां भरपाक जाय, नाजाल्यार समाजांत यादवी मात्तली. लोकसंख्येचे फायदे आसात, पूण लुकसाण चड. एका कुटुंबांत दोन भुरगीं आसात आनी दुसऱ्या पांच. कोणाची पोसवण, शिक्षण बरें जातलें, ताचो प्रत्येकान विचार करचो. आमचो देश गरीब उरला ताका जापसालदार आमची लोकसंख्या. भारता परस ल्हान आनी लोकसंख्येन उणे आशिल्ले देश आमचे उपरांत स्वतंत्र जावन कितलेशेच मुखार पावल्यात. मात चीना सारको देश लोकसंख्येन फुगिल्लो आसतनाय उदरगतीच्या तेंमकार दिसता. थंयचें कडक शिस्तीचें सरकार, भौशिक जिवितांत आशिल्ले खर नेम हें एक कारण. आमचे परस चीन आंवाठान खूब व्हड आसा. ताका लागून लोकसंख्या चड आसली तरी साधनसुविधांचेर व्हडलोसो ताण पडना. मात आमच्या शारांनी कोंबयो घुडांत कोंबिल्ले प्रमाण लोक रावतात. उदक, वीज, कोयर, सीवरेज, येरादारी….. मळांचेर समस्यांचेर समस्या. हें सगलें लोकसंख्येक लागून हाचें भान नागरिकांक आसूंक फाव. चलोच मुखार वंश चलयतलो, इस्टेटीक वारस जाय हे भावनेन आमी लोकसंख्या वाडयत आसात. निदान आतां तरी जागे जावया आनी भारत भुंयेच्या रुखा वयली ही वाडटे लोकसंख्येची बेनुल्ल कापून उडोवया.