लोकसंख्या शिक्षण काळाची गरज

भांगरभूंय | प्रतिनिधी

कुटूंब नियोजनाची मोहीम सरकारी पांवड्यार प्रभावीपणान राबयतात ही थाकाय दिवपी गजाल आसली, तरी चलो जावचो ह्या हट्टाक लागून तीन ते चार आपत्यांक जल्म दिवपी महाभाग अजून लेगीत समाजांत आसात.

काल 11 जुलयाक संवसारीक लोकसंख्या दीस व्हड उमेदीन मनयलो. 11 जुलय 1987 दिसा संवसारांत पांच अब्जावें भुरगें जल्माक आयलें तेन्ना सावन हो दीस संवसारीक लोकसंख्या दीस म्हूण पाळटात. 1987 ते 2021 म्हणल्यार फक्त 24 वर्सांत संवसाराची लोकसंख्या दोन अब्जांनी वाडून ती सात कोटीं मेरेन पावली. हाचोच अर्थ संवसाराची लोकसंख्या गतीन वाडत आसा. भारतांत तर लोकसंख्या वाडीची गती सगल्यांत चड आसा. पोरूं वर्साच भारत चीनाक फाटीं उडोवन संवसारांत सगल्यांत चड लोकसंख्या आशिल्लो देश थारलो. पोरूं वर्साचे सुरवातेकूच तज्ञांनी 2023 वर्सा भारत चीनाक फाटीं घालून सगल्यांत चड लोकसंख्या आशिल्लो देश जातलो असो अदमास उक्तायिल्लो.
फाटल्या वर्सा म्हळ्यार 2023 च्या एप्रील म्हयन्यांत युनायटेड नेशन्स पॉप्युलेशन फ्रंट ह्या संवसारीक लोकसंख्येचो अभ्यास करपी जोड राष्ट्र संघाचे संस्थेन ताची पुश्टी केल्या. युनायटेड नेशन्स पॉप्युलेशन फ्रंटान जाहीर केल्ले आंकवाडी प्रमाण भारताची लोकसंख्या चीना परस चड आसून भारताची लोकसंख्या 140 कोटी परस मुखार गेल्या. भारताची लोकसंख्या 1,428.6 दशलक्ष आसा जाल्यार चीनाची लोकसंख्या 1,425.7 दशलक्ष इतली आसा. म्हणल्यार दोनूय देशांचे लोकसंख्ये मदीं 2.9 दशलक्ष इतलो फरक आसा. ह्या अहवालांत चीनाचे लोकसंख्या वाडीची गती उणी जायत आसा. जाल्यार भारताची लोकसंख्या वाडीची गती सगल्यांत चड आसा अशेंय नमूद केलां. आयज भारताची लोकसंख्या 140 कोटीं परस मुखार गेल्या. देश स्वतंत्र जालो तेन्ना आमची लोकसंख्या 30 कोटी आशिल्ली. हाचो अर्थ फाटल्या 75 वर्सांत आमच्या देशाची लोकसंख्या 110 कोटींनी वाडली. आयज आमी लोकसंख्येंत संवसारांत पयल्या क्रमांकाचेर पावल्यात. हाचो अर्थ, ही कितें अभिमानाची गजाल न्हय. देशाच्या सगल्या समस्यांचें मूळ हे वाडटे लोकसंख्येंतूच आसा.
गतीन वाडपी लोकसंख्येक लागून देशांत अन्न, वस्त्र, निवारो, दुयेंसां आनी दळडीरपण अशे खूबशे प्रस्न उप्रासूंक लागल्यात. विशेश म्हळ्यार देशाचे उदरगतींत वाडटी लोकसंख्या ही एक व्हड आडमेळीं थारत आसा. लोकसंख्या वाडीचो सगल्या गजालींचेर परिणाम जायत आसून विकासाकूय आडखळ जाता. वाडटे लोकसंख्येक लागून देशांतल्या सगल्या नागरिकांच्यो मुळाव्यो गरजो पुरोवप सरकाराक शक्य जायना. ही लोकसंख्या आटापा हाडपा खातीर सरकारा वतीन फावो ते यत्न जायत आसात. पूण समाजांतल्यान अजून लेगीत त्या यत्नांक जाय तसो तेंको मेळना. कुटूंब नियोजनाची मोहीम सरकारी पांवड्यार प्रभावीपणान राबयतात ही थाकाय दिवपी गजाल आसली, तरी चलो जावचो ह्या हट्टाक लागून तीन ते चार आपत्यांक जल्म दिवपी महाभाग अजून लेगीत समाजांत आसात. ह्या आनी अशे लोकसंख्येक लागूनच ही गती वाडत आसा. लोकसंख्या नियंत्रणांत हाडपाची आसत जाल्यार नवे पिळगे मदीं लोकसंख्ये विशीं योग्य दृश्टीकोन आनी जाणीव निर्माण करपाची गरज आसा. ते खातीर नवे पिळगेक लोकसंख्या शिक्षण दिवंक जाय. फक्त 24 वर्सांतूच संवसाराची लोकसंख्या पांच अब्जांनी वाडली जाल्यार देशाची लोकसंख्या 75 वर्सांत 110 कोटींनी वाडली. हे गतीन जर लोकसंख्या वाडत रावली जाल्यार लोकसंख्येचो हो भार वसुंधरा पेलूंक शकची ना. ताचो परिणाम एकूणच मनशाचे जिणेचेर कितें जातलो हें नवे पिळगेक समजावन सांगचें पडटलें.
देशांतली लोकसंख्या जर नियंत्रणांत हाडली ना जाल्यार सगल्यांकूच अडचणींक सामकार वच्चें पडटलें. आमी संवसारीक महासत्ता जावपाचे सपन पळयतात. हें सपन प्रत्यक्षांत हाडपाचें आसत जाल्यार वाडटे लोकसंख्येक आळो घालचोच पडटलो, हें नवे पिळगेक पटोवन दिवचें पडटलें. वाडटे लोकसंख्येक लागून दुश्परिणाम, निर्माण जावपी समस्या हाची विद्यार्थ्यांक म्हायती जावची हे खातीर शाळा, म्हाविद्यालयांनी चर्चासत्रांचें आयोजन करून विद्यार्थ्यांचें प्रबोधन करूंक जाय. लोकसंख्या शिक्षण अप्रत्यक्ष समाजीक शिक्षण आसा. ताका लागून फक्त तरणाट्यांकूच न्हय जाल्यार समाजाकूय ह्या शिक्षणाची गरज आसा. लोकसंख्या शिक्षण ही काळाची गरज आसा. लोकसंख्या वाड आडावपाची आसत आनी देशाक विकासाच्या मार्गार व्हरपाचें आसत आनी देशाक महासत्ता करपाचे आसत जाल्यार लोकसंख्या शिक्षणाक पर्याय ना.