भांगरभूंय | प्रतिनिधी
भांगरभूंय । प्रतिनिधी
पेडणेः देशाच्या संविधानांत बदल करपाचें भाजपान कट कारस्थान रचलां. देश विकपाक सोदपी भाजपाच्या उमेदवारांक आनी सरकाराक हद्दपार करून गोंयच्या दोनूय लोकसभा मतदारसंघांत काँग्रेसच्या रमाकांत खलप आनी कॅप्टन विरियातो फर्नांडीस हांका जैतिवंत करून गोंयकारांचो आवाज लोकसभेंत पावयात असो उलो विरोधी पक्ष फुडारी युरी आलेमांव हांणी मारला. पत्रादेवी हांगा हुतात्म्यो यादस्तिकांक फुलां आर्गां ओपल्या उपरांत रमाकांत खलप हांच्या वेंचणूक प्रचाराक सुरवात करतना ते उलयताले.
ह्या वेळार काँग्रेशीचे दक्षीण गोंय उमेदवार कॅप्टन विरियातो फर्नांडीस, गोंय प्रदेश काँग्रेस अध्यक्ष अमित पाटकार, आमदार अॅड कार्लुस फरेरा, आमदार क्रज सिल्वा, आम आदमी पक्षाचे फुडारी अमित पालेकार, शिवसेना प्रदेश अध्यक्ष जितेश कामत, गोवा फॉरवर्डाचे दुर्गादास कामत, दीपक कळंगुटकार, तृणमूल काँग्रेसाचे जयेय़ शेटगांवकार, बाबी बागकार, राजन घाटे, जितेंद्र गांवकार, आश्विन खलप आनी हेर मानेस्त हाजीर आशिल्ले.
सुटके झुजाऱ्यांनी गोंय मुक्त करपा खातीर आपलें बलिदान दिलें. भाजपा सध्या लोकशायेचो गळो दाबून देशांत हुकूमशाय हाडपाक सोदता. तांकां बुद्ध शिकोवन देशाक सुरक्षीत दवोरपा खातीर सगले विरोधी पक्ष एकठांय येवन तांणी इंडिया आघाडी स्थापन केल्या. देशाक वाटावपा खातीर तशेंच गोंयजी जीवदायिनी म्हादयक वाटावपा खातीर इंडिया आघाडेच्या गोंयांतल्या काँग्रेस उमेदवारांक जैतिवंत करपाचें आवाहन आलेमांव हांणी केलें.
परत क्रांतीची गरज
नरेंद्र मोदी हांच्या फुडारा खाला केंद्रांतल्या भाजपा सरकाराची पावलां सध्या देशांत हुकूमशाय हाडपा कडेन पडपाक लागल्यांत. देशाक तातूंतल्यान वाटावपा खातीर परत एक क्रांती करपाची गरज आसा अशें रमाकांत खलप हांणी सांगलें. फाटल्या पंचवीस वर्सां सावन भाजपाचे श्रीपाद नायक लोकसभेंत उत्तर गोंयचें प्रतिनिधीत्व करतात. मात आजय मेरेन गोंयच्या खंयचेय प्रश्न वा समस्या केंद्र सरकारा सामकार तांणी कित्याक दवोरल्यो नात. संसदेंत गोंयचो आवाज बुलंद करपा खातीर गोंयकारांनी काँग्रेसाच्या दोनूय उमेदवारांक जैतिवंत करपाची गरज आसा अशें रमाकांत खलप हांणी सांगलें.
भाजपा सरकाराक लोकशायेची हत्या करपाक दिवपाक जायना. जाती, धर्मां मदीं लडाय लावपाचें काम भाजप सरकार करतना. गोंयची जमीन राखून दवोरपाक, न्हंयो, दोंगोर सुरक्षीत दवोरपा खातीर साबार लोकां सामकार सध्या एकूच पर्याय आसा आनी तो म्हणल्यार इंडिया आघाडेक केंद्रांत सत्तेर हाडप अशे तांणी सांगलें
मुक्ती खातीर लढो
इंडिया आघाडेच्या गोंयांतल्या पक्षांच्या फुडाऱ्यांनी आनी वावुरप्यांनी पत्रादेवी हुतात्मा यादस्तिका कडेन येवंन देशांत नवी क्रांती करपाचो निर्णय घेतला अशें अमित पाटकार हांणी सांगलें. केंद्रातलें लोकशायेक विरोध करपी भाजपा सरकाराक घडो शिकोवपा खातीर इंडिया आघाडेचें सरकार केंद्रांत सत्तेर येवपाची गरज आसा. सध्या देशांत इलेक्ट्रॉरोल बॉन्ड भ्रश्टाचारा आड. बेरोजगारी आड. देशांतले विघटनवादी शक्ती आड लढो सुरू जाला. जातीयवादी शक्तींक केंद्रातले सत्ते पसून पयस दवोरप हीच आतां खरी क्रांती थारतली अशें तांणी फुडें सांगलें. ह्या वेळार आमदार कार्सुस फरेरा, जितेश कामत, दीपक कळंगुटकार, राजन घाटे, नारायम रेडकार हांची भाशणा जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
