लोकशाय घटमूट करपाक जनसंपर्क गरजेचो

भांगरभूंय | प्रतिनिधी

श्रीपाद नायक : जनसंपर्क दीस कार्यावळींत पत्रकारांचो भोवमान

भांगरभूंय । प्रतिनिधी

पणजी : सरकार आनी सामान्य जनता हांचे मदीं जनसंपर्क हो म्हत्वाचो भाग. लोकशाय घटमूट करपाक जनसंपर्क गरजेचो. सरकाराची उदरगत, येवजण्यो सामान्य जनते मेरेन पावोवपा खातीर जनसंपर्का बगर पर्याय ना, अशें केंद्रीय उर्जा राज्यमंत्री श्रीपाद नायक हांणी म्हणलें.

भारतीय जनसंपर्क मंडळाच्या (पब्लीक रिलेशन्स कावंसील ऑफ इंडिया) गोंय विभागान गोवा मराठी पत्रकार संघाच्या पालवान आयतारा राष्ट्रीय जनसंपर्क दिसा निमतान कार्यावळीचें आयोजन केल्लें. पणजी – मिरामार जाल्ले कार्यावळींत केंद्रीय उर्जा राज्यमंत्री श्रीपाद नायक हे मुखेल सोयरे म्हणून उलयताले. ह्या वेळार तांचे हस्तुकीं पत्रकारां वांगडा जनसंपर्का वरवीं वेवसायिकांचो भोवमान केलो.

सरकार तशेंच लोकशाय कोणा खातीर आनी कित्या खातीर आसा? सामक्या सामान्य मनशा मेरेन उदरगत तशेंच कल्याणकारी येवजण्यो पावपाक जाय. सामान्य मनशाचें मत, ताच्यो आडखळी सरकारा मेरेन पावपाची गरज आसा. हाका लागून जनसंपर्क हो म्हत्वाचो, अशें मंत्री नायक हांणी मुखार म्हणलें.

खासा आमंत्रीत पत्रकार डॉ. निलेश खरे ह्या वेळार हजर आशिल्ले. जनसंपर्क कसो दवरचो, ही गजाल राजकारण्यां कडल्यान शिकची. मनीस एकठांय करप आनी लाखांनी लोकां मेरेन जनसंपर्क दवरपाची कला राजकारण्यांकूच खबर आसता. तशें नवें तंत्रज्ञान, नव्या घडामोडींची म्हायती हेरां परस राजकारण्यांक चड खबर आसता. आयज जनसंपर्का खातीर जायतीं माध्यमां उपलब्ध आसात. तरी जनसंपर्क कितें आसता? वा जनसंपर्काची तांक कितली आसता हें प्रधानमंत्री नरेंद्र मोदीं हांचे कडल्यान शिकपा सारकें आसा, अशें डॉ. खरे हांणी म्हणलें.

ह्या वेळार अमर पाटील (भांगरभूंय), सचीन खुटवळकर (गोवन वार्ता), विभा वर्मा (द गोवन), लौकीक शिलकर (प्रुडंट मिडिया), संदीप केरकार, रामनाथ पै रायकार, संदीप रेडकार, विठ्ठल पारवाडकार, यती लाड, विश्वनाथ नेने, बबन भगत, सचीन कोरडे, चैतन्य सावंत, रमेश नायक राऊत ह्या पत्रकारांक प्रमाणपत्र आनी यादस्तीक भेटोवन भोवमान केलो. सत्कारमुर्तीं वतीन अमर पाटील हांणी मनोगत उक्तायलें. दीपक नार्वेंकार, निखील वाघ, गुरूनाथ पै, निकिता चोडणकार, डॉ. निलेश खरे हांचोय भोवमान केलो.

निखील वाघ हांणी सगल्यांक येवकार दिलो. दिनेश तारे हांणी सुत्रसंचालन केलें. गोवा मराठी पत्रकार संघाचे अध्यक्ष वामन प्रभू हांणी उपकार मानले.