भांगरभूंय | प्रतिनिधी
वेवस्था ही मनशाच्या विचारांतल्यान निर्माण जायत गेली. हातूंत लोकशायेची वेवस्थाय भारतांत निर्माण जाली. हे लोकशायेची मना सावन सांबाळ करप ही दरेका भारतीयाची जापसालदारकी. हो देश म्हजो, हें गांव म्हजें, हें आपलेंपण दरेकाच्या मनांत निर्माण जावप गरजेचें. कारण प्रत्येक जण ताच्या माध्यमांतल्यान लोकशाये कडेन अर्थांत आपल्या जगपाचे वेवस्थे कडेन जोडला. ताका ही वेवस्था आपली दिसपाक जाय. तिचे निर्मितींत ताचो वांटो आसपाक जाय. ते खातीर मतदानाचो अधिकार आयलो आनी लोकशाय सगल्यांची जाली. गरिबांची जाली, तशी ती गिरेस्तांचीय जाली. ‘आसा’ तांची ही लोकशाय तशीच ‘ना’ तांची पसून ही लोकशाय.
अस्तित्वाचे सर्तींत आपलें अस्तित्व निर्माण करपाक प्रत्येकजाण धडपडटा आनी आपलें अस्तित्व निर्माण करपाक पळयता. हें फक्त लोकशाय वेवस्थेतूंच घडपाक शकता.हेर कसलीय वेवस्था तुमकां तुमचें अस्तित्व निर्माण करपाक दिना. तें ती थारायता. तुमचें अस्तित्व कितें आसचें, तुमी कशें जगचें, कशें आसचें हें ती वेवस्था थारायता. तें निर्माण करपाचो तुमचो अधिकार ती न्हयकारता. म्हणून प्रत्येकाचो आसपाचो विचार करपी वेवस्था ही श्रेश्ठ थारता… आनी म्हणूनच ती लोकशाय आसता. एकदा वेंचून येतकच लोकप्रतिनिधी हे लोकांचे प्रतिनिधीत्व करतात, ते तांकां जापसालदार आसतात. हाचो अर्थ असो की, तांणी तांच्या मनशांच्या हिता खातीर काम करप आनी तांकां वेंचून दिल्ल्या लोकांचे विचार आनी मुल्यां प्रतिबिंबीत करपी निर्णय घेवप अपेक्षीत आसता. भौशीक सुनावणी, मिटिंग, मिडीया हे सारक्या लोकशाय यंत्रणां वरवी ते जनतेक जापसालदार आसतात. निमणो लोकशायेंत जनता हो राजकी स्रोत आसा आनी लोकांचे वतीन वेंचून आयिल्ल्या प्रतिनिधींक ती शक्त दितात. अशा प्रकारान लोकशायेच्या तत्वांचें पालन करप आनी लोकांच्या हिताचे नदरेन काम करप हें प्रतिनिधीचें कर्तव्य.
गजानन बा. नायक भाटकार
शिवकृपा, आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
