भांगरभूंय | प्रतिनिधी
-पयल्या लोकनाट्य महोत्सवाचें उक्तावणदिवचलः ना नपयत जावपाच्या वाटेर आशिल्ली राज्यांतली लोककला तिगोवन दवरुन फुडले पिळगे मेरेन व्हरपाची जापसालदारकी युवा पिळगेन आनी सगल्याच घटकांनी स्विकारपाक जाय. ते खातीर सांखळीे रवीन्द्र भवन आनी इंदिरा गांधी राष्ट्रीय कला केंद्रा वतीन ह्या लोककलांचेर संशोधन आनी ताची कागदोपत्री नोंद करून घेवप सुरू आसा. ह्या लोकनाट्य महोत्सवांतल्यान आपल्या लोकनाट्य संस्कृतीचेर दरेक कलाकाराक अभ्यास आनी संशोधन करपाची संदी मेळ्ळ्या ताचो लाव घेवचो. हे कलेच्या माध्यमांतल्यान नव्या कलाकारांनी शिक्षण घेवचें, असो उलो मुख्यमंत्री डॉ. प्रमोद सावंत हांणी मारलो.
सांखळे रवीन्द्र भवनांत कोंकणी संगीत नाटक अकादमी, कला आनी संस्कृती खातें गोंय, रवीन्द्र भवन सांखळी, गोंय कोंकणी अकादमी पणजी, इंदिरा गांधी राष्ट्रीय सांस्कृतीक केंद्र सांखळी, कोंकणी सेवा केंद्र सांखळी हांच्या जोड पालवान आयोजीत गोंयांतल्या पयल्या ‘लोकनाट्य महोत्सव 2024’ चे उक्तावण केले उपरांत मुख्यमंत्री उलयताले.
ह्या वेळार माचयेर पद्मश्री विनायक खेडेकर, सांखळीच्याे नगराध्यक्षा सिध्दी प्रभू, महोत्सवाचें कार्याध्यक्ष झिलू गांवकार, स्वागताध्यक्ष रवींद्र भवनाचे उपाध्यक्ष दत्ताराम चिमुलकार, सचीव पंढरीनाथ परब, पराग नगर्सेकार, इंदिरा गांधी राष्ट्रीय कला केंद्राचे मिडिया नियंत्रक अनुराग पुनेथा, श्रीधर कामत बांबोळकार आनी हेरांची उपस्थिती आशिल्ली.
गांवांत एकाद्या सण उत्सवांत देवाक सांगणें करप म्हणल्यार मागाशिल्ली परंपरा आशिल्ल्याचे जायत्या जाणांक दिसता. पूण गांवांतल्या लोकउत्सवाचें दर्शन हे लोककलेंतल्यान घडटा. देवाक जागृत करतना गांवाक एकठांय दवरपा खातीर आमच्या पूर्वजांनी निर्माण केल्ली ही प्रथा आसून आयज गांवांतले लोक शारांत स्थलांतर जावपाक लागिल्ल्यान गांवांत फकत ज्येश्ठ नागरीक उरल्यात. तांचे कडल्यान हे लोकसंस्कृतीचो सांबाळ जाता. ही कला आनी परंपरा आतां युवा पिळगेन फुडें व्हरपाची गरज आसा. ते खातीर लोकनाट्य महोत्सव उपेगी थारतलो, अशेंय मुख्यमंत्र्यांनी सांगलें.
——————
कोंकणी भास आतां नांवा पुरती उरूंक ना
कोंकणी ही आमची राजभास आसून गोेंय सरकारूय आतां कोंकणींतल्यान येवपी पत्रांक कोंकणींतल्यानूच जाप दिता. अायज कोंकणी भास गोंयापुरती मर्यादीत उरूंक ना. ती आतां लोकसभेंत पावल्या. लोकसभेंत कोंकणी अनुवादक ही पदां भरतले. आतां मेरेन एक अनुवादक मेळ्ळा. ताका लागून कोंकणी भास ही लेगीत फुडार घडोवपी भास आसा. तशेंच कोंकणींत साहित्य निर्मिती जावपाक जाय. नव्या पिळगेंतल्या साहित्यीकांनी कोंकणींतल्यान लेखन करपाक जाय. गोंयची सांस्कृतीक अस्मिता गोंयच्या लोकनाट्य प्रकारांतल्यान भायर येवपाक जाय. आमची लोकनाट्य कला ही परंपरा स्थीर नासता. ती कालांतरा प्रमाण बदलत आसता. लोकांक आतां तेच तेच गजाली अायकुपाचो संयम ना. ते खातीर ह्यो परंपरा आनी लोकसंस्कृती नव्या स्वरूपांत नव्या पिळगे मुखार कशी येतली हाचेर विचार जावपाक जाय, अशें ह्या वेळार पद्मश्री विनायक खेडेकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
