भांगरभूंय | प्रतिनिधी
मेरशेच्या विशेश न्यायालयाचो निकाल
पणजी: पणजेचे ज्येश्ठ भाजपा फुडारी, मंत्री बाबूश मोन्सेरात हांकां मेरशेच्या विशेश न्यायालयान आयज २०१६तल्या लैंगीक अत्याचार प्रकरणांत निर्दोश मुक्त केलें. पुराव्यांच्या उणावाक लागून न्यायालयान हो म्हत्वाचो निवाडो दिलो. सुमार दशकभर चलिल्ल्या ह्या प्रकरणा कडेन पुराय राज्याचें लक्ष लागिल्लें. निमाणें न्यायालयान दोनूय वटेंतले युक्तिवाद आनी पुरावे तपासून मोन्सेरात हांचे वटेन निकाल दिलो.
ह्या प्रकरणा विशीं आपली भुमिका मांडटना मोन्सेरात हांणी सांगलें, फाटल्या कितल्याशाच वर्सां सावन हांवें ह्या आरोपाक लागून जायतें सोंसलां, भोगलां. मात म्हजो भारतीय न्यायवेवस्थेचेर पुराय विस्वास आशिल्लो. ह्या निकालाक लागून म्हाका खोस भोगतां.
नेमकें प्रकरण कितें?
हें प्रकरण २०१६ वर्साचें. एके नेण्टे चलयेन आरोप केल्लो की, तिचे आवयन तिका बाबूश मोन्सेरात (ते त्या वेळार सांताक्रूझचे आमदार आशिल्ले) हांकां विकिल्लें. पिडेस्त चलयेचो असोय आरोप आशिल्लो, तिका गुंगेचें वखद दिवन तिचेर बलात्कार केल्लो म्हूण. ह्या प्रकरणांत गोंय पुलिसांनी बाबूश हांचेर भादंवि कलम ३७६ (बलात्कार) आनी पोक्सो कायद्या खाला गुन्यांव दाखल करून अटकूय केल्ली. उपरांत तांची जामिनाचेर सुटका जाल्ली.
ह्या प्रकरणांत सुमार ४० साक्षीदारांच्यो साक्षी नोंद जाल्यात. तशेंच पुलिसांनी २५० पानांचें आरोपपत्र दाखल केल्लें. तपासा मजगतीं पिडेस्ताचे पिराये विशींय वाद निर्माण जाल्लो. ऑसिफिकेशन टेस्टींत (हाडांचे तपासणेंत) पिडेस्ताची पिराय १६ वर्सां परस चड आशिल्ल्याचें मुखार आयले उपरांत ‘गोवा चिल्ड्रन्स एक्ट’तलीं कांय कलमां काडिल्लीं. मात खटलो चालूच उरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
