भांगरभूंय | प्रतिनिधी
पणजी: लग्नाचें हांयस दाखोवन २४ वर्सां पिरायेचे तरणाटेचेर लैंगीक अत्याचार केल्ल्या प्रकरणांत नागरी सेवेंतल्या कनिश्ठ श्रेणी अधिकार्यांचो अटकपूर्व जामीन अर्ज म्हापशेंच्या अतिरिक्त सत्र न्यायाधीश अपूर्वा नागवेंकार हांणी भायर मारलो.
तिसवाडी म्हालांतल्या २४ वर्सं पिरायेचे तरणाटेन पणजी बायलां पुलीस स्टेशनांत हे विशीं कागाळ दाखल केल्ली. ते कागाळी प्रमाण २७ वर्सां पिरायेचे नागरी सेवेंतले कनिश्ठ श्रेणी अधिकार्यान तिचेर लग्नाचें हांयस दाखोवन लैंगीक अत्याचार केल्ल्याचें म्हणलां.
संबंदीत अधिकारी आनी पिडेस्त तरणाटेची १२ मार्च २०२३ दिसा दक्षीण गोंयांत एके खाजगी कार्यावळींत वळख जाली. उपरांत तांचे वळखीचें रुपांतर इश्टागतींत जालें. हाचे मजगतीं, एप्रील २०२३ वर्सा संबंदीत अधिकार्यान तिका लग्नाची मागणी घातली. उपरांत अधिकार्यान ४ मे २०२३ दिसा दक्षीण गोंयच्या तांच्या फ्लॅटार, तशेंच ७ जून २०२५ दिसा अधिकार्याच्या घरा कोणूच नासतना तांणी तिचेर लैंगीक अत्त्याचार केल्ल्याचें कागाळींत म्हणलां.
हाची दखल घेवन बायलां पुलीस निरीक्षक रीमा नायक हांच्या मार्गदर्शना खाला उपनिरीक्षक रुपाली गोवेकार हांणी अधिकार्यां आड भारतीय न्याय संहितेच्या कलम ६९, ११५(२) आनी ३५२ कलम खाला गुन्यांव दाखल केला.
गुन्यांवाची म्हायती मेळटांच ह्या अधिकार्यान मेरशीच्या उत्तर गोंय जिल्लो आनी सत्र न्यायालयांत अटकपूर्व जामीन अर्ज दाखल केल्लो. ऍड. दामोदर धोंड हांणी ह्या प्रकरणांत युक्तिवाद मांडिल्लो. अधिकार्यांची हालींच बदली जाल्ल्याचे आदेश न्यायालयांत सादर करून, अटक जाल्यार ताची नोकरी वचपाची वा बदनामी जावपाची शक्यताय आशिल्ल्याचें तांणी न्यायालयांत मांडिल्लें. तशेंच, अटकपूर्व जामिनाचेर निर्णय जाय मेरेन ताका अटक करची न्हय अशें अंतरिम समाधान दिवपाची मागणी केल्ली.
ह्या प्रकरणांत न्यायालयान दोनूय बाजू आयकून घेतले उपरांत वयल्या आनी हेर अटींवचेर अधिकार्याक सुरवातेक अंतरिम समाधान दिल्लें. मात सुनावणी पुराय जाले उपरांत न्यायालयान तें रद्द करीत आरोपीचो अटकपूर्व जामीन अर्ज भायर मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
