लैंगिक शिक्षण मुळाव्या पांवड्या सावन

भांगरभूंय | प्रतिनिधी

लैंगिकताय, शरीर रचणूक, कुडीचे बदल, प्रजनन प्रक्रिया, लिंगिक भलायकी, सुरक्षीत लैंगिक वागणूक आनी परस्पर संबंद हांचे विशीं गिन्यान मेळोवप म्हळ्यार लैंगिक शिक्षण.

लैंगिक शिक्षण यत्ता णववी मेरेन न्हय, तर ताचे आदीं मुळाव्या पावंड्यार सावन सुरू जावंक जाय असो आदेश सर्वोच्च न्यायालयान दिला. लैंगिक शिक्षण ही अस्तंतेची संकल्पना न्हय, भारतांत ह्या शिक्षणाक खूब म्हत्व आसा. देखून तरणाट्यां मदीं अनैतिकता वाडना. हें शिक्षण भारतीय मुल्ल्यां आड आसा अशें कांय लोक मानतात, अशें न्यायालनान म्हणलां. देखून जायत्या राज्यांनी लैंगिक शिक्षणाचेर बंदी घाल्या. ह्या विरोधांक लागून तरणाट्यांक अचूक म्हायती मेळना. मागीर ते इंटरनेटाचेर वतात. थंय चड करून चुकीची म्हायती मेळटा.
मुखेल न्यायाधीश डी. वाय चंद्रचूड, न्यायाधीश जे बी परदीवाला आनी न्यायाधीश मनोज मिश्र हांच्या खंडपिठान मद्रास उच्च न्यायालयाच्या निर्णयाक न्हयकार दितना, ही टिप्पणी केल्या. ‘चायल्ड पोनोग्राफी डावनलोड’ करून पळोवप हो ‘पॉक्सो’ आनी ‘आयटी’ कायद्या खाला गुन्यांव, अशें न्यायालयान म्हणलां.
सर्वोच्च न्यायालयाचीं चार मुखेल विधानां
1) योग्य शिक्षण दिवप म्हत्वाचें. महाराश्ट्रांतल्या 900 परस चड जुवानपणांतल्या भुरग्यांचेर केल्ल्या अभ्यासांत प्रजनन आनी लैंगिक भलायके विशीं योग्य गिन्यान विद्यार्थ्यांक ना. देखून तांचे मदीं बेगीन लैंगिक संबंद दवरपाची चड शक्यताय आशिल्ली.
2) लैंगिक शिक्षण विशींचे गैरसमज पयस करप गरजेचें. तांच्या फायद्या विशीं सगळ्यांक योग्य म्हायती दिवची.
3) भुरग्यां आड जावपी गुन्यांव फकत लैंगिक अत्याचारा मेरेन मर्यादीत नात. तांचे व्हिडियो, फोटे आनी रेकॉडिंगांतल्यान हें शोशण चालू आसा.
4) आमी संसदेक सुचयतात, ‘पोस्को’ (pocso) कायद्यांत दुरूस्ती करची आनी ‘बाल अश्र्लीलताय’ ही संज्ञा ‘बाल लैंगिक अत्याचार ‘ आनी शोशण साहित्य (CSEAM) म्हूण वापरची.
‘भुरग्यांचो लैंगिक अत्याचार आनी अपशब्द’ संज्ञा वापरात
न्या. जे बी परदीवालान सांगलां,- ‘चायल्ड पोर्नोग्राफी’ बदला, फुडारांत सावन ‘ भुरग्यांचो लैंगिक अत्याचार आनी अपशब्द’ ही संज्ञा वापरची. केंद्र सरकारान आदेश हाडून बदल करचे. न्यायालयान लेगीत ही संज्ञा वापरूंक फावोना.
आमीच जर लैंगिक शिक्षणाचेर उलोवंक शकना जाल्यार ‘इंटरनेट गूगल’, तांचो पयलो गुरू जातलो. हो भंय आसाच, हातूंत दुबाव ना. आयज लैंगिक शिक्षणा विशीं चले रिलांतल्यान म्हायती घेतात. जाल्यार चलयो आकांतांतल्यान शिकपाक लागल्यात. आनी गूगल तांचे बेस बरें पेरेंटींग करता. जाल्यार हांगाच अस्वस्थ करपी पूण तितलोच गरजेचो प्रस्न म्हणल्यार आमी, आमच्या पुताक बायलांक मान वा रेस्पेद दिवपाक कशें शिकयतात? जेन्ना दोळ्यांचो संपर्क करून ‘संमती’ लेगीत घेवंक जंय मेळना. थंय समाज अजुनूय चलयांक मौन आनी गोंदळांची म्हायती दिता. तेन्ना आमी आत्मविश्वास आनी निर्भयान भरिल्ल्यो धुवो कश्यो वाडयतलीं? तज्ञ अजून मानतात, चले आनी चलयो एकठांय बसयल्यार शिकतात. पूण विरहांत लजेतात. शिक्षकांक प्रशिक्षण दियात. धैर्य शिकोवपाक लजेस्त लोकांक वर्गांत धाडूं नाकात. बेगीन उलयात, सातत्यान उलयात, फुतफूतनासतना उलयात. नातर मौन जिखतलें. आनी ‘मौन केन्नाच फकत एका भुरग्यांच्या शिकारीची (प्रेडटर) राखण करिना.’
वास्तवीक ट्विट
‘लिंग’ वा ‘सेक्स’ ह्या विशयाचेर उलोवपाक शिक्षक धरून पालकांनी लेगीत स्पश्ट रुपांत, म्हाका न्हयकार दिलो. ‘आवोयस्स s..s. !’ , ‘ आंवंय शीं s..s..s !’ अशी किळसवाणी उमाळी भासूय वापरून म्हजी निंदाय केली. पूण जेन्ना वास्तवीक संवादच जर लुकसाण जाल्या उपरांत सुरू जालो जाल्यार ताका “ शिक्षण काय पोस्टमार्टम? ” म्हणचो, असो प्रस्न म्हजे सामकार उबो रावलो. आयज जेन्ना ‘सेक्स’, हें उतर मोट्यान लेगीत उलोवपाक आमी चड लजतात; धजतात. तेन्ना आमच्या भुरग्यांक आमी कितें शिकवण दितलीं? लैंगिक शिक्षणांचे विशीं खरेंच धैर्य केल्ल्या तिगांले विचार आमी जाणून घेवया.
‘शरीरा विशीं जाणून घेवप हो अधिकार : डॉ. कंटक
लैंगिक शिक्षण, शोशण, संबंध आनी लिंगिकता ह्यो गजाली भुरग्यांक कोणें शिकोवच्यो? नैतिकता जर लैंगिक संबंदांतल्यान सांबाळपाक जाय, तर समजून, उमजून पावल घालपी, जापसालदार आनी निरोगी पिडी तयार करप आमचें कर्तव्य न्हय? जर संतुलीत जेवणा बद्दल आमी भुरग्यांक शिकयलें, तर तीं चड खातलीं? वा कित्या कितेंय खातलीं असो आमकां भंय दिसता? जाल्यार लैंगिकते बाबतींत हे विचार कित्या खातीर? कारण आमी लैंगिक शिक्षणाक अश्लिल थारायलां. जी चार चवगांत उलोवपाची गजाल न्हय, फकत फुतफुतपाची गजाल. आमच्या कुडींत जो लिंगिक भाग आसा, ताचे विशीं आमकां इतलें अज्ञान आनी गैरसमज आसात, कितलेशेच जाण त्रास जाल्यारय सांगीनांत. आमची कूड न्ही तर? तो भाग वेगळो करूं येता? वायट वा वीट येवपाचो आसूं येता? म्हजे कडेन खूब तरणाटीं भुरगीं अशे मानसीक आनी शारिरीक त्रास घेवून येतात. जांचें अर्दें कारण – गैर समज. कारण जर भुरग्यांक आमी विज्ञानीक रितीन शिकयनांत, जाल्यार सुध्दा तीं शिकयतात. पूण आपले परीन, चुकीच्या पद्धतीन. मोबायल आनी स्कुटर वापर करतात न्ही तीं शिकय नासतना ? तशींच. अशें मानसोपचार तज्ञ डॉ वीणा कंटक म्हणटात.
शाळांनी हें शिकोवंक जाय : म्हाळशी
गोमंतक बाल शिक्षण परिशदेचे अध्यक्ष कमलाकर म्हाळशी हांणी सांगलें, – लैंगिक शिक्षण शाळांनी दिवचें काय दिवचें न्हय, ह्या मुद्याचेर आयजूय आमचें एकमत जायना ! ताचें कारण म्हणल्यार ‘लिंग’, उतरा कडेन पळोवपाची आमची नदर अजुनूय निवळ, स्पश्ट आनी विज्ञानीक ना. खरें म्हणल्यार लैंगिक शिक्षणांत लिंगिक म्हायती आनी आरोग्य म्हत्वाचें आसता. ताचे फुडें कामजीवन, भुरगें जल्माक घालप बी गजाली येतात. कांय रोग, दुयेंसां हीं मनशाचे कुडीच्या लैंगिक अवयवां वरवीं जाता हाची म्हायती करून दिवपाक जाय. आयचीं भुरगीं विज्ञान आनी तंत्रगिन्यान अश्या काळांत जल्माक येतात. देखून तांकां खुबश्यो गजाली कळटात. तेन्ना शिक्षकांनी पालकांक विश्वासांत घेवन, भुरग्यांचे भावनेचीं जतनाय घेवन निवळ अंतस्करणान हो वावर करचो पडटलो. तेन्नाच नवीन शिक्षण धोरणाचे बुन्यादीचेर नव्या – नव्या विशयांचे वळेरेंत लैंगिक शिक्षण खात्रेन बेस्स बरो वावर करपाक पावतलें.
कुडीच्या प्रक्रियांचो एक वांटो : गायतोंडे
मुळावी शाळेंत पयलीं, मुळाव्या पावंड्यार सादे पद्दतीन लैंगिक शिक्षण दिवंक सुरू करचें. मागीर भुरग्यांचीं पिराय वाडटा तशी सगळ्यां माध्यमांचीं भुरगीं स्वताच ह्यो गजालीं शिकतलीं. दुबाव ना. आमचें कामूय सोंपें जातलें. कारण तांकां आतां,तंत्रगिज्ञानाच्या नव्या प्रगतीची संवय जाल्या. हालींच्या काळांत किड्स हिट प्युबर्टी धा वर्साचे पिरायेचेर सुरू जाता. तांकां बी घडणुकेचें कारण, परिणाम, आनी जतनाय घेवन विचार विनिमय करूंक पालक शिक्षकांनी मजत करचीं. आतां वेळ आयला, पिरायेच्या 7 ते 12 वर्सांच लैंगिक शिक्षणाक सुरू जाता. देखून भुरग्यांनी लजूंक फावोना. तांणी लक्षांत घेवचें की, तो रोग न्हय, उरफाटीं ती जिणेची एक घडणूक आनी कुडीचे प्रक्रियांचो एक वांटो. ही गुपीत दवरपाची गजाल न्हय. हे घडणुकेचे विशीं उक्तेंपणान चर्चा जावंक जाय अशें मडगांव शिक्षण संस्थेच्या, न्यू र्इरा विद्यालयाचे अध्यक्ष उल्हास गायतोंडे हांणी सांगलें.
सोंपयतना…
लैंगिकता, शरीर रचना, कुडीचे बदल, प्रजनन प्रक्रिया, लैंगिक भलायकी, सुरक्षीत लैंगिक वागणूक आनी परस्पर संबंद हांचे विशीं गिन्यान मेळोवप म्हळ्यार लैंगिक शिक्षण. हाका लागून भुरग्यांची कूड आनी मनाची समजूत तयार करपाक आदार करता. तेन्ना आयज वेळ आयला, विद्यालयां वांगडाच समाजाच्या दरेका विभागान -, जावं पालक, शिक्षक, समाज सेवक, संस्थां आनी सरकार हांणी एकठांय येवन भुरग्यां खातीर सुरक्षीत आनी भलायकेक बरें वातावरण दिवपाचो यत्न करचो. हें शिक्षण फकत विद्यार्थ्यां वांगडाच पुराय समाजा पासत तितलेंच म्हत्वाचें. तेन्नाच खात्रेन, फुडारांत जापसालदार, भलायकेन भरिल्लो आनी समतावादी समाज उबारप शक्य जातलें.

विशाल सिनाय खांडेपारकार
8080622370