भांगरभूंय | प्रतिनिधी
भारताच्या दादल्यांच्या फुटबॉल पंगडान सॅफ वस्तादपण सर्तींतले उमळशीक वाडोवपी दुसरे सेमी फायनलींत लेबनान पंगडाक शुटआवटांत हारोवन फायनलींत सुवात मेळयली.
श्री कांतीरवा स्टेडियमाचेर जाल्ले मॅचीच्या 90 मिनटांच्या खेळांत दोनूय पंगडांक गोल करपाक येस मेळूंक ना. ताका लागून 30 मिनटांचो अतिरिक्त वेळाचो खेळ जालो. अतिरिक्त वेळाच्या खेळांत सुनील छेत्री आनी उदांता सिंग गोल करपाक सामके लागीं पाडिल्ले. पूण, तांचे यत्न फुकट गेले. अखेरेक अतिरिक्त वेळाच्या खेळांतूय दोनूय पंगड गोलाविणें बादाबाद उरिल्ल्यान निकाल लावपाक शुटआवटाचो आदार घेवचो पडलो.
शुटआवटांत भारता वतीन मुखेली सुनील छेत्री, अन्वर अली, महेश सिंग आनी उदांता हांणी गोल केले, जाल्यार लेबनान वतीन फकत वालिद शोर आनी मोहम्मद सादिक हांणी गोल केले.
सध्याचो वस्ताद भारत सेगीत दुसरो आनी वट्ट णववो किताब जिखपा पसून फकत एक पावल पयस आसा. फायनलींत तो कुवेता आड खेळटलो. पयले सेमी फायनलींत ताणें बांगलादेशाक 1-0 असो हारयलो.
भारतान सर्तींत अजून मेरेन एकूय मॅच हारूंक ना. ताणें पाकिस्तान आनी नेपाळ ह्या पंगडांक हारयल्यात, जाल्यार कुवेता आडची मॅच 1-1 अशी बरोबरींत उरिल्ली.
मजगतीं, भारतान जून म्हयन्याचे सुरवातीक इंटरकॉण्टिनॅण्टल करंड लीग मॅचींत लेबनानाक गोलाविणें बादाबाद आडायिल्लो. ते उपरांत फायनलींत लेबाननाक 2-0 अशा गोल फरकांनी हारोवन वस्तादपण जोडिल्लें. काल परतून एकदा लेबनानाक हारोवपाक भारतान येस मेळयलें.
भारत 13वे खेपे सॅफ वस्तादपण सर्तीचे फायनलींत पावलो. ताणें सगल्यांत चड आठ खेपे ही सर्त जिखल्या. चार खेपे उप वस्तादपणाचेर समाधान मानलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
